नेपाली कांग्रेसले भ्रातृ संस्था नेपाल थारू संघको प्रथम महाधिवेशन गर्ने भएको छ।
कांग्रेस केन्द्रीय कार्यालयका अनुसार यही जेठ १६ र १७ गते सानेपामा महाधिवेशन हुनेछ।
विशेष महाधिवेशनपछि कांग्रेसमा पहिलो भ्रातृ संस्थाको महाधिवेशन हुन लागेको हो।
गत पुसमा विशेष महाधिवेशनबाट गगन थापा नेतृत्वमा नयाँ कार्यसमिति आएको थियो।
नेपाल थारू संघको तदर्थ समिति तत्कालीन सभापति शेरबहादुर देउवाले बनाएका थिए।
विशेष महाधिवेशनबाट देउवा नेतृत्वको कार्यसमिति हटेको र देउवा उपचारका लागि विदेशमा रहेका बेला नेपाल थारू संघको पहिलो महाधिवेशन हुन लागेको हो।
महाधिवेशनको महाधिवेशनको जेठ १६ गते मध्याह्न १२:१५ बजे सभापति गगन थापाले उद्घाटन गर्नेछन्। महाधिवेशनमा पार्टीभित्रका सबै समूह (विशेष महाधिवेशनमा भाग लिएको वा नलिएका) सबै नेताहरूलाई निम्ता गर्ने तयारी छ।
शिवनारायण महतो गुरौ नेपाल थारू संघ तदर्थ समिति सभापति छन्। शिवनारायण सभापति रहेको थारू संघमा २०८० माघ १४ गते पार्टी सभापति देउवाले ९८ जना सदस्य मनोनीत गरेका थिए।
तदर्थ समिति बनेको झन्डै साढे २ वर्षपछि नेपाल थारू संघले महाधिवेशन गर्न लागेको हो।
थारू संघले महाधिवेशनका लागि तयारी गरिरहेकोले विशेष महाधिवेशनबाट आएको नयाँ कार्यसमितिले पनि सोही तदर्थ समितिलाई निरन्तरता दिने निर्णय गरेको थियो।
निर्धारित समयमा महाधिवेशन तयारी नगरेका नेपाल तरूण दललगायत ५ भ्रातृ संस्था भने स्वत: विघटन गरिएकोमा हालै सभापति गगन थापाले महाधिवेशन गर्ने गरी तरूण दल र महिला संघको नेतृत्व नियुक्त गरेका छन्।
नेपाल महिला संघ र तरूण दलमा पुन: तदर्थ समिति गठन गरेकोमा सभापति थापाको आलोचना भइरहेका बेला नेपाल थारू संघमा भने महाधिवेशन गर्न लागिएको हो।
थारू संघका केन्द्रीय सभापति शिवनारायण महतो गुरौले महाधिवेशन तयारी अन्तिम चरणमा पुगेको सेतोपाटीलाई जानकारी दिए।
महाधिवेशनमा देशभरबाट ५ सयभन्दा बढी प्रतिनिधि सहभागी रहने उनले बताए।
थारू संघको कार्यसमिति ५१ सदस्यीय रहने व्यवस्था छ।
‘महाधिवेशन अन्तिम तयारीमा हामी छौं, पार्टीभित्रका सबै नेताहरूलाई महाधिवेशन उद्घाटन सत्रमा निम्तो गरिन्छ, पत्र पठाउने चरणमै छौं,’ उनले सेतोपाटीसँग भने।
तत्कालीन सभापति देउवाले गठन गरेकै तदर्थ समितिबाट नेपाल थारू संघको महाधिवेशन हुन लागेको अवस्थामा देउवा र नेता शेखर कोइराला पक्षका नेताहरू महाधिवेशन उद्घाटन सत्रमा आउँछन् कि आउँदैनन् यकिन भइसकेको छैन।
यसबारे सोधिएको प्रश्नमा निवर्तमान प्रचार विभाग प्रमुख मीनबहादुर विश्वकर्माले अहिलेको कार्यसमितिले गर्ने कार्यक्रममा निवर्तमान कार्यवाहक सभापति पूर्णबहादुर खड्का र नेता शेखर कोइराला पक्ष सहभागी नहुने प्रतिक्रिया दिए।
‘पार्टी केन्द्रीय कार्यालय सानेपाले गर्ने औपचारिक कार्यक्रममा पूर्ण र शेखर दाइको अडान र जुन धारणा छ, त्यसलाई उहाँहरूले साझा कार्यक्रम मानिरहनुभएको छैन,’ नेता विश्वकर्माले सेतोपाटीसँग भने।
देउवाकै पालामा गठन गरिएको तदर्थ समितिले गर्ने अधिवेशन उद्घाटनमा पनि सहभागी नहुने भन्ने पूरक प्रश्नमा उनले भने, ‘त्यो त हो, देउवाकै पालका धेरै पदाधिकारीहरू अहिले सानेपातिरै जानुभएको छ, तर अहिले केन्द्रीय कार्यालयले गरिरहेको कुनै पनि औपचारिक कार्यक्रममा पार्टीभित्रको असन्तुष्ट समूहको कुनै सहभागिता रहँदैन।’
सभापति गगन थापाले नेविसंघ, तरूण दल, महिला संघलगायत भ्रातृ संस्था विघटन गरी कतिपयमा नयाँ नियुक्त गरेको अवस्था रहेको भन्दै नेता विश्वकर्माले भने, ‘एउटा एउटा विषयमा टिप्पणी गर्नुभन्दा पनि पार्टीको बृहत्तर एकता र भावनात्मक सहभागिता नभएसम्म सानेपा कांग्रेसले गरेको निर्णय पूर्ण र शेखर दाइको समूहका लागि अमान्य छ।’
कांग्रेसले भने सकेसम्म सर्वसहमतिबाट नभए निर्वाचनबाट नेपाल थारू संघको कार्यसमिति चयन गरिने बताएको छ।
