प्रतिनिधि सभाको निर्माणाधीन नयाँ हलबाट बजेट प्रस्तुत नहुने भएको छ।
तयारी पूरा नभएको उल्लेख गर्दै संघीय संसद सचिवालयले नयाँ हलमा बजेट प्रस्तुत गर्न नसकिने जनाएको हो।
यसअघि सहरी विकास मन्त्रालय अन्तर्गतको भवन निर्माण विभागले जेठ १५ गते बजेट प्रस्तुत गर्ने गरी नयाँ हल तयार पार्ने दाबी गरेको थियो।
'फर्निचर र फिनिसिङको काम सकिने चरणमा छ। तर अडिओ/भिडिओ, मास्टर कन्ट्रोल रूम लगायतका प्राविधिक कारणले नयाँ बैठक कक्षबाट बैठक सञ्चालन गर्नेमा सुनिश्चित हुन सकिएन', संघीय संसद सचिवालयका प्रवक्ता एकराम गिरीले सेतोपाटीसँग भने, 'त्यसैले बहुउद्देशीय हलबाटै बजेट प्रस्तुत गर्नुपर्ने बाध्यतामा हामी छौँ।'
निर्माणाधीन प्रतिनिधि सभाको हलमा सिट राख्ने काम सम्पन्न भएको छ। तर माइक सिस्टम जडान भएको छैन। हलमा डिस्प्ले स्क्रिनहरू राख्न बाँकी छ। प्रतिनिधि सभाको नयाँ हल फिल्म हल जस्तो भएको भन्दै नेकपा एमालेका सांसद ऐन महरले प्रतिनिधि सभा बैठकमा प्रश्न उठाएका छन्।
नयाँ बैठक कक्षमा डेस्क र सिटबीच दुरी बढी भएकोमा सभामुख डोलप्रसाद अर्यालले यसअघि नै प्रश्न उठाइसकेका छन्।
नयाँ हलको माथिल्लो ग्यालरीमा राखिएको सिटबाट प्रतिनिधि सभाको बैठक कक्षमा भएका गतिविधि नै नदेखिने गरी डिजाइन गरिएको पाइएको छ।
सभाको बैठक कक्षमा फोटो खिच्ने पत्रकारहरूलाई ठाउँ छुट्याइएको छैन। हलमा ठूला ठूला डिस्प्ले राख्ने तयारी छ। तर तिनीहरूको जडान कार्य सम्पन्न भएको छैन। सभामुखको क्षेत्र सानो बनाइएको छ। राष्ट्रपति, राष्ट्रिय सभाका अध्यक्ष आउँदा सभामुखको आसन क्षेत्रमा साँघुरो हुने देखिन्छ।
प्रतिनिधि सभाको बैठक कक्ष डिजाइन गर्दा नै संघीय संसद सचिवालयका अधिकारीहरूले सहरी विकास मन्त्रालयसँग छलफल नगरेको आरोप लगाएका थिए। फलस्वरूप बैठक कक्ष देख्न आकर्षक भए पनि संसदीय आवश्यकताभन्दा भिन्न देखिएको छ।
-1779869535.jpg)
