नेकपा एमालेका अध्यक्ष केपी शर्मा ओलीले पार्टीमा पुनर्गठन र पुनर्जागरण ल्याइने भन्दै निराशा र पलायनको बाटो नरोज्न आग्रह गरेका छन्।
पार्टी छाडिरहेकाहरूलाई सम्बोधन गर्दै ओलीले अन्तरपार्टी निर्देशन (अपानि) मार्फत् इतिहासका विभिन्न कालखण्डमा गम्भीर भन्दा गम्भीर चुनौतीलाई सामना गर्दै पार्टी राष्ट्रिय राजनीतिको केन्द्रीय भूमिकामा स्थापित भएको विगत सम्झाएका छन्।
‘निर्वाचनमा व्यहोर्नुपरेको गम्भीर पराजयका कारणले पार्टीको एउटा हिस्सा निराश र पलायन हुन खोजेको अवस्था छ। यसप्रकारको अवस्थामा सुधार ल्याउनु र पार्टीपंक्तिमा आशाको संचार जागृत गर्नु आवश्यक छ। पार्टी समीक्षाको चरणमा रहेको हुँदा केन्द्रीय कमिटीको बैठकबाट पार्टी पुनर्गठन र पुनर्जागरणको कार्य योजना अघि बढाइने छ। पार्टी सदस्यता नवीकरणको प्रक्रियाबाट नै त्यो काम अघि बढाउने छ। जतिसुकै गम्भीर समस्या भए त्यसको समाधान सम्भव छ। चुनौती जतिसुकै जटिल भए पनि त्यसको पनि सामना गर्न सकिन्छ। इतिहासका विभिन्न कालखण्डमा गम्भीरभन्दा गम्भीर चुनौतीलाई सामना गर्दै पार्टी राष्ट्रिय राजनीतिको केन्द्रीय भूमिकामा स्थापित गरिएको हो भन्ने सत्यलाई मनन गरेर पार्टी काममा सक्रियताका साथ जुट्न म सम्पूर्ण कमरेडहरूलाई हार्दिक अनुरोध गर्दछु,’ उनले भनेका छन्।
यतिबेला पार्टी र आन्दोलनसामू गम्भीर चुनौती खडा भएको उनको विश्लेषण छ। लामो बलिदानीपूर्ण संघर्षबाट प्राप्त भएको नेपालको संविधान नै संकटमा रहेको चित्रण गरेका छन्।
लोकतान्त्रिक गणतन्त्रको भविष्य संकटमा रहेको उनले दाबी गरेका छन्। संसदीय लोकतन्त्रको हुर्मत लिने काम वर्तमान सरकारबाट भइरहेको उनको ठम्याइ छ।
‘नयाँ र पुरानाको नाममा लोकतन्त्रका लागि लामो संघर्ष गरेका राजनीतिक दल र नेतृत्वलाई विस्थापित गर्ने षड्यन्त्र जारी छ। भूराजनीतिक द्वन्द्वमा नेपालीको भूमिलाई दुरुपयोग गर्न चाहने स्वार्थी तत्वहरुको चलखेल बढेको छ। नवगठित सरकारका काम र क्रियाकलापहरूले नेपालीको भौगोलिक अखण्डता नै संकटमा पर्ने हो कि भन्ने गम्भीर आशंका पैदा भएको छ,’ ओलीले अपानिमार्फत् विश्लेषण गरेका छन्।
यस्तो अवस्थामा पार्टी आन्दोलनको मात्र होइन, लोकतान्त्रिक भविष्यको सुनिश्चिताका लागि संविधानको रक्षा गर्ने अभिभारासमेत पार्टीसामू रहेको उनले बताएका छन्।
विश्व व्यवस्थामा भइरहेको हलचल र त्यसका प्रभाहरुबाट क्षेत्रीय अस्थिरता उत्पन्न नहोस् र नेपालको सार्वभौमसत्ता र अखण्डतामा समस्या नआओस् भन्नका लागि पनि हाम्रो पार्टी सबल र सुदृढ हुनु आवश्यक रहेको उनले औंल्याएका छन्।
‘निश्चय नै निर्वाचनको अस्वभाविक परिणामबाट हामी सबै चिन्तित छौं। पार्टीका सामू उत्पन्न चुनौती र संकटलाई सामना गरेर नै हामीले निर्वाचनका समयमा भन्ने गरेको देश पहिला भन्ने नाराको सार्थकतालाई पुष्टि गर्न सफल हुनेछौं। भदौ २३ र २४ को घटनापछि उत्पन्न असहज परिस्थिति, पार्टीभित्र उत्पन्न अन्तरविरोध समेतका कारणले हामीले समयअगावै एघारौं राष्ट्रिय महाधिवेशन आयोजना गर्यौं,’ उनले भनेका छन्।
प्रतिगमनतर्फ अग्रसर भएको मुलुकलाई संविधान र लोकतन्त्रको बाटोमा फर्काउनका लागि प्रतिनिधिसभाको पुनस्र्थापना अपरिहार्य छ भन्ने एमालेको विश्लेषणलाई नेपालका अन्य लोकतान्त्रिक दलहरूले साथ नदिएको उनले बताएका छन्।
त्यही कारणले एमाले पार्टीसमेत निर्वाचनमा जानुपरेको उनले बताएका छन्। कात्तिकमा बसेको केन्द्रीय कमिटी बैठकले संसद पुनस्र्थापनाको बाटो समातेको थियो। तर एमालेले फागुन २१ को चुनावमा भाग लियो।
संसद पुनर्स्थापनका लागि आन्दोलन गर्ने केन्द्रीय कमिटीको निर्णय नबदली एमालेले चुनावमा भाग लिएको भन्दै ओलीको पार्टीभित्र आलोचना भएको थियो।
‘निर्वाचनको परिणाम हाम्रो पार्टीका पक्षमा रहेन नै। नेपालको प्रमुख लोकतान्त्रिक पार्टीहरुको पक्षमा समेत रहे । यसमा कहाँ के कस्तो कमिकमजोरी रहे? कस्को के कस्तो भूमिका रह्यो भन्ने कुरा समयक्रममा उजागर समेत हुँदै जाला। तर पनि यो निर्वाचन अघिपछिको निर्वाचन जस्तो रहेन। यसको परिणाम पनि स्वभाविक रहेन। यस सन्दर्भमा पार्टीले समीक्षा प्रतिवेदनमार्फत आफ्नो दृष्टिकोण बाहिर ल्याउने नै छ,’ उनले भनेका छन्।
वर्तमान सरकार र निर्वाचन आयोग प्रदेशसभा र स्थानीय तहका निर्वाचन एकैसाथ गर्ने गरी तयारीमा जुटिरहेको पनि उनले बताएका छन्।
एमाले निर्वाचन समीक्षा र पुनर्गठनबारे सुझाव प्रस्तुत गर्न रामबहादुर थापा ‘बादल’को नेतृत्वमा १५ सदस्यीय कार्यदल बनाएको छ।
जसमा उपाध्यक्षहरू विष्णुप्रसाद पौडेल, पृथ्वीसुब्बा गुरुङ, महासचिव शंकर पोखरेल, उपमहासचिव लेखराज भट्ट, सचिवहरू छविलाल विश्वकर्मा, पद्मा अर्याल, भानुभक्त ढकाल र आठै प्रदेशका इञ्चार्जहरू सदस्य छन्। आठ प्रदेशका इन्चार्जमा सुदूरपश्चि दामोदर भण्डारी, कर्णाली प्रदेश यामलाल कँडेल, गण्डकी खगराज अधिकारी, बागमती महेश बस्नेत, राजधानी राजन भट्टराई, मधेस लीलानाथ श्रेष्ठ, कोशी शेरधन राई सदस्य छन्।
