नेपाली कम्युनिस्ट पार्टी (नेकपा)का सह-संयोजक माधवकुमार नेपालले रक्षात्मक बन्न आवश्यक रहेको बताएका छन्।
शनिबार काठमाडौंमा आयोजित अखिल नेपाल महिला संगठन एकता राष्ट्रिय भेलामा उनले संविधान निर्माणमा महिला र दलितको प्रतिनिधित्व सुनिश्चित गर्न आफूहरूले महत्वपूर्ण भूमिका खेलेको दाबी गर्दै अहिले पार्टीका नेता–कार्यकर्ता अनावश्यक रूपमा रक्षात्मक बन्न नहुने बताएका छन्।
नेपालले २०४७ सालमा संविधान निर्माण भइरहेका बेला नै महिला र दलितको विशेष उपस्थितिलाई अनिवार्य बनाइएको स्मरण गराउँदै संविधानसभामार्फत संविधान निर्माणको क्रममा त्यसलाई थप संस्थागत गरिएको बताए।
उनका अनुसार स्थानीय तहदेखि राज्यका विभिन्न निकायसम्म नेतृत्व तहमा महिला प्रतिनिधित्व सुनिश्चित गर्न संवैधानिक व्यवस्था गरिएको हो।
उनले प्रमुख पदमा पुरुष भए अर्को पदमा महिला हुनुपर्ने मान्यतासहित प्रतिनिधित्वको व्यवस्था गरिएको उल्लेख गर्दै राष्ट्रपति, उपराष्ट्रपति, राष्ट्रिय सभा, प्रतिनिधि सभा, सभामुख र उपसभामुखलगायतका पदमा महिलाको उपस्थिति अनिवार्य बनाइएको बताए।
नेपालले संविधान निर्माण र समावेशी प्रतिनिधित्वको सवालमा अहिलेका सत्तारुढ दलका नेताहरूको भूमिका प्रश्न गर्दै भने, “यी अहिले जितेका पार्टीका मान्छेलाई सोध्नुस् त, उनीहरूलाई थाहा छ ? उनीहरूले कुनै भूमिका खेलेका छन् ? त्यो बेला भूमिका खेल्ने को हुन् ?'
हालको राजनीतिक अवस्थाबारे टिप्पणी गर्दै उनले आफ्नो पार्टीभित्र केही साथीहरू 'डिफेन्सिभ' अर्थात् रक्षात्मक अवस्थामा पुगेको आफूले पाएको बताए।
विरोधी पक्ष आक्रामक देखिए पनि आफूहरू भाग्नुपर्ने अवस्था नरहेको उनको भनाइ थियो।
'केही आवश्यकता छैन भाग्नुपर्ने । यो एउटा सुनामी आयो, यो सुनामी मात्रै हो,' नेपालले भने।
उनले पछिल्ला राजनीतिक घटनाक्रम र निर्वाचन प्रक्रियामाथि विभिन्न प्रश्न उठिरहेको उल्लेख गर्दै यसका कारणबारे खोजी भइरहेको पनि बताए। सेना, सरकार, निर्वाचन आयोग र मतपत्र व्यवस्थापनको भूमिकाबारे समयसँगै तथ्य बाहिर आउने उनको दाबी थियो।
बेला–वखतमा पोल खोल्दिन्छु भन्ने कुरा पनि सुनिन्छ । सेनाको भूमिका कस्तो रह्यो ? सरकारको भूमिका कस्तो रह्यो ? निर्वाचन आयोगको भूमिका कस्तो रह्यो ? मतपत्रको अवस्था कस्तो रह्यो ? यी सबै कुरा एक न एक दिन खुल्दै जानेछन्,' उनले भने।
