नेपाली कम्युनिस्ट पार्टी (नेकपा)का नेता वर्षमान पुनले सामाजिक सञ्जाल र डिजिटल प्ल्याटफर्मबाट उदाएका शक्तिहरू स्थानीय तहको चुनाव नआउँदै तल खस्न सक्ने बताएका छन्।
शनिबार काठमाडौंमा आयोजित एक कार्यक्रममा बोल्दै नेता पुनले डिजिटल लहरबाट उदाएका शक्तिहरू दिगो नहुने र छिट्टै ओरालो लाग्ने दाबी गरेका हुन्।
'अहिले यति तीब्रतामा आएको आन्दोलन त्यस्तै तिब्रतामा जान सक्छ। यो निर्वाचन गयो, लग्यो। ०८२ सकियो होइन, स्थानीय चुनाव जाँदा नजाँदै पनि तल झर्न सक्छ,' उनले भने।
उनले भोलि पुरानै स्थापित दलहरूले देश सम्हाल्ने अवस्था आउने पुनको दाबी थियो।
नेकपाले तरिका पुर्याएर क्रान्तिकारी ढंगले गए फेरि छिट्टै नयाँ भन्नेहरू 'कोल्याप्स' हुने उनले बताए।
'अहिले गतिमा छ र तीब्र छ। पञ्चायत कालमा भूमिगत एक-एक संगठन, जनयुद्ध र जनआन्दोलन कालमा दुई-दुई वटा जम्मा गरेर गएको जसरी आएको होइन यो आन्दोलन,' उनले भने।
विगतको पञ्चायतकालीन संघर्ष र जनयुद्धको जस्तो ठोस संगठनात्मक आधार नभएका कारण हालको ‘भर्चुअल’ लहर स्थायी उनले बताए।
पुनले अहिलेको डिजिटल युगमा एजेण्डाहरू सामाजिक सञ्जालबाटै तय हुने र त्यहाँ कुनै निश्चित नेतृत्व नहुने बताए।
'यो यति धेरै आक्रामक छ, तीब्र छ कि कतिखेर कहाँ विष्फोट हुन्छ भन्न सकिने अवस्था छैन, यस्तो छ। अहिलेको शक्ति असाध्यै हिंसात्मक र असाध्यै ध्वंशात्मक छ। यो खालको विशेषता देखियो भनेको छ र नेपालमा ठ्याक्कै त्यही भएको छ,' उनले भने।
आम निर्वाचनमा पनि बुथमा समेत मान्छे नभएको अवस्था भोट गन्दा भने हजारका हजार आएको बताए।
'मान्छे छैन तर कहाँ छ? भर्चुअल दुनियाँमा छ। अनलाइनमा छ, सामाजिक सञ्जालमा छ। त्यसैले हामीले सामाजिक सञ्जालमा हाम्रा संगठनहरु आजको प्रविधिमैत्री कसरी बनाउने भन्ने चुनौती छ,' उनले भने।
भर्चुअल दुनियाँबाट छिट्टै उठेको आन्दोलन तीब्र रुपमै तल जान सक्छ भनेर पनि बुझाउनुपर्ने उनले बताए।
'अस्तिको २०७९ को चुनावमा मधेसतिर सिके राउतहरु ठूलो पार्टी भएर आएका थिए, अहिले त कहीँ पनि छैनन्। एकदम छिटो माथि गयो, छिटो गयो। यस्तो खालको हुन्छ,' उनले भने।
-न्युज एजेन्सी नेपाल
