पूर्वगृहमन्त्री सुधन गुरूङको सेयर लगानी र अन्य सम्पत्तिको स्रोतमाथि उठेको प्रश्नबारे छानबिन गर्न बनेको समितिलाई थप पाँच दिनको समय उपलब्ध भएको छ।
उच्च अदालतका पूर्वन्यायाधीश अच्युतप्रसाद भण्डारी अध्यक्ष रहेको समितिलाई मंगलबारदेखि लागु हुने गरी थप पाँच दिनको समय दिएको हो।
यो समितिमा महालेखा नियन्त्रक शोभाकान्त पौडेल र सहन्यायाधिवक्ता अच्युतमणि नेउपाने सदस्य छन्।
सदस्य नेउपानेले सुधन गुरूङको बयान र तथ्य अध्ययन लगायतका काम सकिएको जानकारी दिए।
‘अन्य काम सबै सकिसकेका छन्। अब हामी प्रतिवेदन लेख्ने काममा लागेका छौं। ५ दिनको समय आजदेखि सुरू भएको छ,’ उनले भने।
वैशाख २३ गते बसेको मन्त्रिपरिषदको बैठकले उक्त समिति गठन गर्ने निर्णय गरेको थियो। समितिले प्रतिनिधि सभा सदस्य एवं पूर्वगृहमन्त्रीसँग सम्बन्धित उठेका विषयमा सत्यतथ्य अध्ययन तथा छानबिन गर्न भनेको हो।
यस समितिलाई १५ दिनको समय दिइएको थियो। तर उक्त समितिले काम गर्न थालेयता समयावधि सोमबार सकिएको हो।
गत वैशाख ९ गते गुरूङले आफूमाथि प्रश्न उठेको भन्दै पदबाट राजीनामा दिएका थिए। सेयर लगानीको स्रोत र सम्पत्ति शुद्धीकरण अनुसन्धानका लागि हिरासतमा रहेका दिपक भट्टसँग व्यावसायिक साझेदारी देखिएपछि विवादमा परेका हुन्।
उनले आफू पदमा रहँदा स्वार्थको द्वन्द्व नदेखियोस् भनेर राजीनामा दिएको बताएका थिए।
