श्रम संस्कृति पार्टीका दलका नेता हर्कराज राईले प्रधानमन्त्रीले प्रतिनिधि सभा बैठकमा आएर नेपालले भारतको सीमा कहाँ कहाँ मिचेको छ? भन्ने पुष्टि गर्नुपर्ने बताएका छन्।
प्रधानमन्त्री बालेन शाहले जेठ १७ गते प्रतिनिधि सभा बैठकमा नेपालले पनि भारतको जग्गा मिचेको अभिव्यक्ति दिएका थिए।
उक्त अभिव्यक्तिलाई लिएर प्रतिनिधि सभामा विपक्षी दलहरूले बैठक अवरूद्ध पार्दै आएका छन्।
उनीहरूले सभामुखले प्रधानमन्त्रीको अभिव्यक्ति रेकर्डबाट हटाउनुपर्ने तथा प्रधानमन्त्रीले संसदको रोष्टमबाट माफी माग्नुपर्ने माग गर्दै आएका छन्।
प्रतिनिधि सभाको बैठक अवरूद्ध पार्ने क्रममा श्रम संस्कृति पार्टीका नेता राईले प्रधानमन्त्री शाहको अभिव्यक्ति सच्याउनुपर्ने बताए।
'सत्तापक्ष र विपक्ष भन्ने कुरा छैन। देशको सीमाना, अखण्डता, सार्वभौमसत्ता जोगाउने कुरा हो', राईले भने, 'हामी सबै सांसदको एउटै माग हुन जरूरी छ। प्रधानमन्त्री जस्तो व्यक्तिले दिएको जेठ १७ गतेको अभिव्यक्ति सच्याउनुपर्छ। उहाँ यहाँ उपस्थित हुनुपर्छ।'
राईले प्रधानमन्त्रीले बिना पुष्टि बोलेको भए ३ करोड नेपालीसँग माफी मागर्नुपर्ने बताए।
'नेपालले भारतको सीमा कहाँ कहाँ मिचेको छ, उहाँले पुष्टि गर्नुपर्छ', राईले भने, 'सरकारलाई गल्ती गर्ने छुट हुँदैन। सरकारले गल्ती गर्न पाउँदै पाउँदैन। हुँदै हुँदैन। यदि उहाँले आवेगमा आएर अथवा बिना पुष्टिको कुरा राखेको भए हामीलाई होइन, हर्क साम्पाङ सहित सांसदलाई होइन, तीन करोड नेपालीलाई सम्बोधन गरेर माफी माग्नुपर्छ। यस्तै भइहालेछ भनेर माफी माग्नुपर्छ।'
दलका नेता राईले प्रधानन्त्रीको हाजिरी समेत सार्वजनिक गर्न माग गरेका छन्।
प्रधानमन्त्री शाह प्रतिनिधि सभा बैठकमा कमै मात्र सहभागी हुने गरेका छन्। राईले प्रतिनिधि सभा नियमावलीको नियम ४ को १ मा प्रत्येक सदस्यले बैठकमा सहभागी हुनु अघि हाजिरी गर्नुपर्ने व्यवस्था रहेको उल्लेख गरे।
'प्रधानमन्त्री आउँदा हाजिर गर्नुभएको छ कि छैन। हेर्न अभिलेख शाखालाई आग्रह गर्दछु। यदि उहाँले हाजिर गर्नुभएको छैन भने प्रतिनिधि सभा सदस्य नरहेको ठहर हुन्छ,' राईले भने, 'संविधानको धारा ७७ को १ को मा प्रतिनिधि सभा सदस्य नरहेको हकमा प्रधानमन्त्री पदबाट मुक्त हुनुपर्छ भनेको छ। हाजिर अभिलेखमा छ कि छैन।'
-1780393116.jpg)
