नेकपा (एमाले) का महासचिव शंकर पोखरेलले काठमाडौंमा आवश्यक पर्दा कम्तीमा ५ हजार जनालाई चाहेको बेला उभ्याउन सक्ने आधार तत्काल तयार गर्न जनसंगठनका इन्चार्ज र अध्यक्षहरूलाई निर्देशन दिएका छन्।
पार्टी केन्द्रीय कार्यालय च्यासलमा सोमबार बसेको जनसंगठन समन्वय संयन्त्रको बैठकलाई सम्बोधन गर्दै उनले पार्टी र जनताबीचको सम्बन्ध थप सुदृढ बनाउन तथा संगठनलाई समुदायस्तरसम्म विस्तार गर्नुपर्नेमा जोड दिए।
महासचिव पोखरेलले संकटका बेला संगठन र कार्यकर्तासँगको सम्पर्कलाई थप सघन बनाउनुपर्ने बताए।
उनले नेतृत्वको वास्तविक क्षमता र खुबी संकटका समयमा नै परीक्षण हुने उल्लेख गर्दै चुनौतीपूर्ण परिस्थितिमा धैर्यता, एकता र स्पष्ट दृष्टिकोणका साथ अघि बढ्नुपर्ने धारणा राखे।
'जति बेला संकट गहिरिन्छ, त्यति बेला कार्यकर्तालाई सम्पर्कमा राख्ने कुरा अझ महत्वपूर्ण हुन्छ। नेतृत्वको खुबी र क्षमता पनि संकटमै देखिन्छ,' उनले भने, 'संकटका बेला हतारमा गरिने निर्णयले दुर्घटनातर्फ पुर्याउन सक्छ। त्यसैले धैर्यता र एकता कायम राखेर अघि बढ्नुपर्छ।'
पार्टीभित्र समस्या रहेको भन्दै निराशा फैलाउनेभन्दा समाधान खोज्ने संस्कृतिको विकास गर्नुपर्नेमा उनले जोड दिए।
तलका समस्या माथिसम्म नपुर्याउने र माथिका समस्या मात्र देखाउने प्रवृत्ति संगठनका लागि हितकर नभएको बताउँदै उनले पार्टीमा समस्या छ कि छैन भन्नेभन्दा पनि त्यसको समाधान कसरी गर्ने भन्ने विषय महत्वपूर्ण भएको उल्लेख गरे।
महासचिव पोखरेलले पार्टीमाथि जनताको भरोसा र सम्बन्धलाई समग्र रूपमा विश्लेषण गर्नुपर्ने आवश्यकता औंल्याए।
उनका अनुसार पार्टीले जनतासँगको सम्बन्धलाई निरन्तर बलियो बनाउन नसके संगठनात्मक चुनौतीहरू थप जटिल बन्न सक्छन्।
हालैको निर्वाचन परिणामबारे चर्चा गर्दै उहाँले पार्टी पंक्तिबाट प्राप्त रिपोर्ट र बुझाइ निर्वाचनको दुई दिनअघिसम्म उत्साहजनक रहेको भए पनि परिणाम अप्रत्याशित र अकल्पनीय रूपमा आएको बताए।
उनले निर्वाचन परिणामबाट पार्टीले गम्भीर समीक्षा गर्नुपर्ने आवश्यकता रहेको उल्लेख गरे।
'हामी जनतासँग अपिल गर्ने ठाउँमा मात्र सीमित भयौं। जनतासँगको हाम्रो सम्बन्ध कमजोर बन्न पुगेको छ,' उनले भने, 'जनताले हामीलाई विश्वास नगरेका होइनन्। उनीहरूले अहिलेका लागि घण्टीमा मतदान गरेर हामीलाई सबक सिकाउने प्रयास गरेका हुन्। भविष्यमा आवश्यक पर्दा चाहिने शक्ति एमाले नै हो भन्ने बुझाइ जनतामा अझै कायम छ।'
उनले पार्टीको सांगठनिक जीवनलाई व्यवस्थित र गतिशील बनाउन सदस्यता नवीकरण अभियानलाई प्रभावकारी ढंगले सञ्चालन गर्न निर्देशन दिए।
पार्टी सदस्यताको नियमित नवीकरणले संगठनलाई चलायमान र अनुशासित बनाउने उनको भनाइ थियो।
सम्बोधनका क्रममा महासचिव पोखरेलले प्रधानमन्त्रीको पछिल्लो अभिव्यक्तिको पनि आलोचना गरे।
उनले उक्त अभिव्यक्तिलाई घातक, आपत्तिजनक तथा नेपालको भू-राजनीतिक संवेदनशीलता विपरीत रहेको टिप्पणी गरे। यस्ता अभिव्यक्तिले नेपालको राष्ट्रिय हित र भविष्यमा समेत नकारात्मक प्रभाव पार्न सक्ने उनको भनाइ थियो।
उनले जनसंगठनहरूलाई प्रधानमन्त्रीको अभिव्यक्तिबारे जनतालाई सुसूचित गराउन र त्यसको राजनीतिक प्रतिवाद तथा भण्डाफोरमा सक्रिय भूमिका खेल्न आग्रह गरे। साथै भूमिहीन, असहाय तथा विपन्न समुदायका जनताको हितमा काम गर्न र जनविरोधी नीति तथा निर्णयको विरोध गर्न पनि निर्देशन दिए।
