नेकपा एमालेका अध्यक्ष केपी शर्मा ओलीले पार्टीभित्र समीक्षा गर्नुपर्नेमा केही नेताहरु आत्मभर्त्सना गरेर बसिरहेको बताएका छन्।
पार्टीको सदस्यता नवीकरण तथा विस्तार उत्प्रेरणासम्बन्धी दुई दिने कार्यशालामा बोल्दै निर्वाचनपछि समीक्षा हुनुपर्नेमा नेताहरूमा अन्योल देखिएको भ्रम पालेर हिँडिरहेको बताएका हुन्।
'फेरि नयाँ शिराबाट हामीले आफूले तयार गर्न जरूरी छ। आफूलाई तयार गर्न सँगै मित्र शक्ति खोज्ने उनीहरूलाई सहमत गराउने र अगाडि बढाउने कुरा आवश्यक छ। हाम्रो पार्टीभित्र पनि आँत्तिने हरेस खाने खालका प्रवृत्ति देखा परे,' उनले भने।
एमाले अलिकति हुरीबतास चल्नेबित्तिकै ढलिहाल्ने, लत्रिहाल्ने खालको कलिला पातहरू जस्तो पार्टी नभएको उनले बताए। त्यसकारण अफ्ठ्यारो परिस्थितिमा पार्टी एकताबद्ध हुन जरूरी रहेको उनको भनाइ छ।
'कतिपय साथीहरूमा अन्योल देखा पर्यो। विरोधीले कत्रो हमला गरिरहेको छ। कसरी हमला गरेको छ त्यो कुरा नबुझ्ने अनी आफ्नै आत्मभर्सना गर्ने? आफैले के-के गरियो, कमी गरियो भनेर भर्त्सना गर्ने? केही पाइएन भने शीर काटेर टेबुलमा राखिदियो, शीर बिनाको भयो भने हाम्रो पार्टी मज्जाले अगाडि बढ्छ कुद्छ भन्ने भ्रम पालिरहेका छौं,' उनले भने।
समीक्षा हुनुपर्ने तर त्यसको उद्धेश्य पार्टीलाई चुस्त राख्ने उद्धेश्यले हुनुपर्ने उनले बताए।
'अगाडि आइपर्ने समस्याको समाधान गर्ने कि हाम्रै कमजोरी हो, हामी नै अगतिला हौं। हाम्रो घर जलाएको ठीकै हो, हामीले घर जलाउन किन रोक्न सकेनौं? यस्ता कुरा गरेर हुन्छ? सिंहदरबार जलाउन किन रोक्न सकेनौं भनेर हुन्छ? सेनाले रोक्न सकेन हामी के गरेर रोक्छौं?,' उनले भने।
