नेपाली कम्युनिस्ट पार्टीका सांसद विष्णुबहादुर विश्वकर्माले प्रधानमन्त्री बालेन शाहको राजीनामा माग गरेका छन्।
बुधबार बसेको राष्ट्रिय सभाको बैठकमा उनले प्रधानमन्त्री शाहले राष्ट्रघात गरेको आरोप लगाउँदै तत्काल राजीनामा दिन माग गरे।
उनले प्रधानमन्त्रीले प्रतिनिधि सभामा सांसदले सोधेको प्रश्नको जबाफ नदिएर कपोलकल्पित, आधारहीन र नाटकीय अभिव्यक्ति दिएको आरोप लगाए।
प्रधानमन्त्रीले दिएको ‘नेपालले भारतको भूमि अतिक्रमण गरेको रहेछ’ भन्ने अभिव्यक्ति उल्लेख गर्दै उनले त्यसको कुनै तथ्यगत आधार नरहेको दाबी गरे।
उनले प्रधानमन्त्रीको उक्त भनाइले नेपालको भौगोलिक अखण्डता र सार्वभौमसत्तामाथि आँच पुगेको जिकिर गरे।
प्रधानमन्त्रीको अभिव्यक्ति विखण्डनकारी र आत्मसमर्पणवादी भएको उनको दाबी छ।
उनले प्रधानमन्त्रीसँग नेपालले भारतको कुन भूभाग, कहाँ र कति अतिक्रमण गरेको हो भन्ने यकिन तथ्याङ्क सार्वजनिक गर्न माग गररे। साथै, उक्त जानकारी कुन प्रतिवेदनमा आधारित हो भन्ने स्पष्ट पार्दै सम्बन्धित प्रतिवेदन सहित राष्ट्रिय सभामा उपस्थित भएर जबाफ दिन चुनौती दिए।
सांसद विश्वकर्माले प्रधानमन्त्रीको अभिव्यक्तिपछि सुस्ता क्षेत्रमा भारतीय सशस्त्र सीमा बल (एसएसबी) ले नेपाली भूमिमा हस्तक्षेप गरेको आरोप समेत लगाए।
उनले भने, ‘प्रधानमन्त्रीले सांसदको सोधेको प्रश्नको उत्तर दिन छाडेर नसोधिएको प्रश्नको झूटो कुराको पोको फुकाउनुभयो। म प्रधानमन्त्री भएपछि मात्रै थाहा पाए, नेपालीले पनि भारतको मिचिएको रहेछ, भन्नुभयो। हालसम्म नेपाल र भारतलाई थाहै नभएको, सीमा विज्ञले समेत जानकारी नपाएको, कहीँ कतैबाट पनि पुष्टि नभएको कपोकल्पित, आधारहीन, नाङ्गो नाटकीय अभिव्यक्ति दिएर सच्चा नेपालीलाई लज्जाबोध मात्रै गराएन, नेपालको हित विपरीत बोलेर राष्ट्रघात गर्नुभयो। प्रधानमन्त्रीको विखण्डनकारी अभिव्यक्तिको घोर आपत्ति र निन्दा गर्दछु।’
‘भौगोलिक अखण्डता र सार्वभौमसत्तामा आँच पुर्याउने कार्य प्रधानमन्त्रीबाट भएको छ, यस्तो राष्ट्रघाती प्रधानमन्त्रीलाई त्यही कुर्सीमा टाँसिरहने अधिकार छैन, विखण्डनकारी र आत्मसमर्पणवादी प्रधानमन्त्रीले तुरून्तै राजीनामा दिनुपर्छ। प्रधानमन्त्री बालेन शाहलाई म सोध्न चाहन्छु, प्रधानमन्त्रीज्यू नेपालले भारतको जमिन कुन कुन स्थानमा, कति जग्गा अतिक्रमण गरेको छ? राष्ट्रिय सभामा उभिएर यकिन तथ्याङ्कको माग गर्दछु। तपाईंले प्राप्त गरेको तथ्यांक कुन प्रतिवेदनको हो? त्यो प्रतिवेदन सहित राष्ट्रिय सभामा उपस्थित भएर जबाफ दिनुहोला। प्रधानमन्त्रीज्यू तपाईंको भनाइकै उक्साहटमा भारतीय एसएसबीले नवलपरासी जिल्लाको सुस्तामा पुगेर नारायणी नदीमा निर्माणाधीन तटबन्ध रोक्न ताण्डवनृत्य मच्चायो। निमार्ण कार्य रोक्न दादागिरि गरेर आज निर्माण कार्य रोकिएको छ। त्यो तपाईंको कारणले हो।’
उनका अनुसार नारायणी नदीमा निर्माणाधीन तटबन्ध रोक्न भारतीय पक्षले दबाब दिएको र निर्माण कार्य अवरूद्ध भएको छ। विदेशी फौज प्रयोग गरेर नेपालको निर्माण कार्य रोक्नु अर्को राष्ट्रघात भएको उनको भनाइ छ।
‘विदेशी फौज लिएर नेपालको निर्माण कार्य रोक्नु अर्को राष्ट्रघात हो। यो नाङ्गो लम्पसारवाद हो। नेपाल भारतको मनमुटाव गराएर द्वन्द्व मच्चाएर विध्वंश मच्चाउने अब अर्को हर्कत तपाईं नगर्नुस्, त्यो भन्दा राजीनामा दिएर आराम गर्दा नै राम्रो हुन्छ।’
नेपाल–भारत सम्बन्ध हाल चिसिएको अवस्थामा प्रधानमन्त्रीले आफ्नो पार्टीका सभापतिलाई दूतका रूपमा भारत पठाएको भन्दै विश्वकर्माले त्यसलाई चाकडीबाजको संज्ञा दिए।
उनले लिपुलेक क्षेत्रमा भारतले चीनसँगको व्यापारिक नाका सञ्चालन गरेर नेपालमाथि हस्तक्षेप गरेको बताए।
भारतले नेपालको ६ हजार २ सय ६२ हेक्टर भूमि कब्जा गरेको दाबी गर्दै उनले नेपालले हालसम्म कुनै पनि देशको भूमि अतिक्रमण नगरेको बताए।–न्युज एजेन्सी नेपाल
