नेपाली कांग्रेसले युवाकेन्द्रित अभियान सञ्चालन गर्ने भएको छ।
महामन्त्री प्रदीप पौडेल संयोजक रहेको सदस्यता व्यवस्थापन समिति बैठकले युवाकेन्द्रित अभियान सञ्चालन गर्ने निर्णय गरेको हो।
‘नेपाली कांग्रेसको विधान,२०१७ (संशोधनसहित) को धारा ४ को व्यवस्थाअनुसार ३५ वर्षमुनिका युवाहरुलाई क्रियाशील सदस्यता वितरण गर्न युवाकेन्द्रित अभियान सञ्चालन गर्ने निर्णय गर्दछ,’ निर्णयमा उल्लेख छ।
कांग्रेसको नयाँ विधानअनुसार हरेक प्रतिनिधि सभा क्षेत्रबाट ३ जना युवा महाधिवेशन प्रतिनिधि आउने व्यवस्था छ।
रूपान्तरण र पुस्तान्तरणका लागि भन्दै कांग्रेसले गत पुसमा विशेष महाधिवेशन पनि गरेको थियो। उक्त महाधिवेशनले गगन थापा नेतृत्वमा कार्यसमिति चयन गरेको थियो।
यो कार्यसमिति असोजमा १५ औं महाधिवेशन गर्ने तयारीमा जुटेको छ। त्यसका लागि क्रियाशील सदस्यता अद्यावधिक गरिएका छन् भने नयाँ वितरण गर्न आवेदन खुला गरिएका छन्।
