नेपाली कम्युनिस्ट पार्टीका नेता वर्षमान पुनले जनताको पक्षमा लड्न सक्ने पार्टीले दुई तिहाई ल्याउन सक्ने बताएका छन्।
शनिबार पार्टीसम्बद्ध वुद्धिजिवी संगठनको राष्ट्रिय एकता भेलालाई सम्बोधन गर्दै नेता पुनले २० सिटको रास्वपा त्यसरी नै दुई तिहाई जनमत प्राप्त शक्ति बनेको बताएका हुन्।
'रास्वपाले नवयुवाको आन्दोलनको स्वामित्व लियो भन्ने जनतालाई लाग्यो । सुशासनका लागि लड्यो भनेर जनताले भोट दियो । जो लड्छ, त्यही विकल्प हुन्छ । जनताले उसैलाई बहुमत दिन्छ,' उनले भने।
तर झन्डै दुई तिहाईको सरकारले पनि राष्ट्रियता, संवैधानिक अधिकारमाथि अंकुश र सदनलाई हेप्ने काम गरेको बताउँदै त्यो प्रवृत्ति विरूद्ध लड्ने उनले बताए।
‘आफूसँग बहुमत छ अध्यादेशबाट शासन, जनताका अधिकारमाथि अंकुश, संसदको अपमान, संविधानले दिएको अधिकार प्रयोग गरेर खोलिएका ट्रेड युनियनको खारेजी, भारतले सीमा मिचेको तथ्यहीन अभिव्यक्तिजस्ता विषयमा हामी लड्न सक्नुपर्छ, लड्छौं पनि,' उनले भने।
लोकतन्त्रको पक्षमा लडेर आफूलाई सान्दर्भिक बनाउन सकेको खण्डमा मात्रै जनताले विश्वास गर्ने उनले बताए।
'समाजवादी क्रान्तिका लागि लड्न सक्छौं । हामी लड्यौं भने जनताले विश्वास गर्छ,' उनले भने।
उनले राणा शासन अन्त्यपछि ०१५ सालमा भएको पहिलो आमनिर्वाचनमा कांग्रेस, ०४७ सालको संसदीय निर्वाचनमा कांग्रेस र तत्कालीन वाम मोर्चा, ०६२/०६३ को क्रान्तिपछि तत्कालीन माओवादी र गत २३ र २४ को नवयुवाको आन्दोलनपछिको निर्वाचनमा राष्ट्रिय स्वतन्त्र पार्टी (रास्वपा) ले जनमत पाउनुमा एउटै कारण रहेको बताए।
‘हरेक निर्वाचनमा जसले शक्तिका विरुद्धमा र बेथितिका विरुद्धमा लडेको छ, त्यसैले जनमत पाउँदै आएको छ’, पुनले भने।
उनले गणतन्त्र, समावेशीता, धर्मनिरपेक्षता ल्याउन तथा सामाजिक न्याय स्थापित गर्न निर्णायक भूमिका खेलेको कम्युनिष्ट पार्टीले ती उपलब्धीका महत्वबारे स्थापित गर्न नसक्दा रक्षात्मक बन्नुपरेको उनले बताए।
पूर्वराजा ज्ञानेन्द्र शाहले ‘कू’ गर्दा दीपावली गरेका जनताले नै उनलाई सत्ताबाट लखेटेको इतिहास स्मरण गराउँदै उनले भर्चुअल माध्यमबाट आर्जित लोकप्रियता दिगो हुनेमा शंका व्यक्त गरे।
नेता पुनलेलामो समयपछि श्रीलंकामा कम्युनिष्ट पृष्ठभूमिको दल सरकारमा फर्किएको, अमेरिकाको न्यूयोर्कजस्तो पुँजीवादको केन्द्रमा समाजवादी विचारधाराका युवाले मेयर जितेको तथा अमेरिका र युरोपका देशहरुमा कम्युनिष्ट झण्डा बोकेर मानिसहरुले प्रदर्शन गर्न थाल्नुले समाजवादी आन्दोलनको भविष्य नसकिएको संकेत गरेको बताए।
'हामी नेपालमा समाजवादको कुरा गर्दा डराउनुपर्ने जस्तो देखिएको छ, यो होइन। आज अमेरिका र युरोपका देशहरुमा मानिसहरु कम्युनिष्ट झण्डा बोकेर हिंड्न थालेका छन्,’ उनले भने।
