प्रहरी महानिरीक्षक (आइजिपी) पदमा पुनर्बहालीको माग गर्दै दानबहादुर कार्कीले पेस गरेको रिट निवेदन सर्वोच्च अदालतमा अध्ययन भइरहेको छ।
सर्वोच्च अदालतको मुद्दा महाशाखा प्रमुख ठगिन्द्र कट्टेलले रिट निवेदन अध्ययनकै क्रममा रहेको र आज शुक्रबार दर्ता हुन सक्ने जानकारी दिए।
'रिट अहिले मुद्दा महाशाखामा अध्ययन भइरहेको छ,' कट्टेलले सेतोपाटीसँग भने, 'आज दर्ता हुन सक्छ।'
सामान्यतया कानुनी प्रक्रिया मिलाएर ल्याइएको छ भने मुद्दा महाशाखाले रिट दर्ता गर्छ। नमिलेको भए फर्काइन्छ।
कार्कीका अधिवक्ता टीकाबहादुर कुँवरले पनि रिट निवेदन मुद्दा महाशाखामा अध्ययन भइरहेको र आजै दर्ता हुन सक्ने बताएका छन्।
सरकारले आइजिपी पदबाट हटाएपछि कार्की पुनर्बहालीको माग गर्दै सर्वोच्च अदालत पुगेका हुन्।
उनका तर्फबाट वारेसमार्फत बिहीबार पेस गरिएको रिट निवेदन अध्ययनकै क्रममा रहेकाले दर्ता हुन सकेको थिएन।
रिट शुक्रबार दर्ता भए पनि प्रारम्भिक सुनुवाइ भने तिहार बिदापछि मात्रै हुने छ।
मन्त्रिपरिषदको बुधबारको बैठकले कार्कीलाई प्रहरी महानिरीक्षक पदबाट हटाएर प्रधानमन्त्रीको सुरक्षा सल्लाहकार नियुक्त गर्ने निर्णय गरेको थियो।
तर कार्कीले सुरक्षा सल्लाहकारको नियुक्ति नलिई सरकारको निर्णयविरुद्ध सर्वोच्च अदालतमा रिट निवेदन पेस गरेका हुन्।
सरकारले कार्कीलाई हटाएर मनोज केसीलाई नयाँ प्रहरी महानिरीक्षक नियुक्त गरेको थियो।
