नीट (राष्ट्रिय योग्यता परीक्षा) प्रश्नपत्र लीक प्रकरणको विरोधमा भारतको राजधानी दिल्लीबाट सुरू विद्यार्थी आन्दोलनले बिहीबार देशव्यापी रूप लिएको छ।
महाराष्ट्रको मुम्बईमा बुधबार हजारौं विद्यार्थी र युवाहरू सरकार विरोधी नारा लगाउँदै सडकमा ओर्लिए।
'ककरोच जनता पार्टी' (सिजेपी) ले गरेको यो प्रदर्शनका धेरै भिडिओ अहिले सामाजिक सञ्जालमा भाइरल भएका छन्। तीमध्ये तीनवटा दृश्यले सबैको ध्यान खिचेका छन् —
१. प्रहरीको गाडी अगाडि उभिएकी मोडल
सबभन्दा बढी हेरिएको यो भिडिओमा २७ वर्षीया मोडल रिया अहिर मुम्बईको शिवाजी पार्क नजिकै गुडिरहेको प्रहरी भ्यानअगाडि उभिएकी छन्।
प्रहरीले पक्राउ परेका प्रदर्शनकारीलाई लिएर जान खोज्दा उनी दुवै हात गाडीमा राखेर अगाडि उभिएकी हुन्।
प्रहरीले गाडी बिस्तारै अघि बढाउन खोजे पनि उनले बाटो छाडिनन्। लगत्तै अन्य प्रदर्शनकारीले पनि गाडी घेरेपछि प्रहरी भ्यान रोक्न बाध्य भयो।
त्यसपछि भित्र रहेका केही प्रदर्शनकारी बाहिर निस्किए। सामाजिक सञ्जालमा धेरैले रियाको हिम्मतको प्रशंसा गरेका छन्।
२. गुडिरहेको प्रहरी भ्यानको ढोका खोलेर साथीहरूलाई छुटाए
अर्को भाइरल भिडिओमा पक्राउ परेका प्रदर्शनकारीहरूलाई लैजाँदै गरेको प्रहरी भ्यान देखिन्छ।
उक्त भिडिओमा एक प्रदर्शनकारी दौडिएर जान्छन् र गुडिरहेको प्रहरी भ्यान पछाडिको ढोका खोलिदिन्छन्। ढोका खुल्नासाथ भित्र रहेका थुप्रै प्रदर्शनकारी बाहिर निस्किएर भाग्छन् र वरपरका मानिसहरूले ताली बजाउँछन्।
यी दुवै घटनाबारे मुम्बई प्रहरीले अहिलेसम्म कुनै आधिकारिक भनाइ दिएको छैन।
३. स्कुले बालबालिकाले हल्लाए हात
आन्दोलन क्रममा केही रोचक दृश्य पनि देखिए। दादरको एउटा विद्यालय अगाडिबाट प्रदर्शनकारीहरू जाँदै गर्दा स्कुलभित्र रहेका साना बालबालिकाले उनीहरूलाई हेरेर उत्साहका साथ हात हल्लाए।
प्रदर्शनकारीहरूले पनि हाँस्दै बालबालिकालाई हात हल्लाएर आफ्नो मार्च अगाडि बढाए।
कक्रोच जनता पार्टीले नीट परीक्षामा भएको धाँधलीको छानबिन माग गर्दै मुम्बईमा प्रदर्शन गरेको हो। सामाजिक अभियानी सोनम वाङचुकको अनसनका कारण पनि यो मुद्दा अहिले भारतभर चर्किएको छ।
दिल्लीमा सुरक्षा व्यवस्था कडा, सिआरपिएफ टोली खटियो
नीट प्रश्नपत्र लीक विवादलाई लिएर कक्रोच जनता पार्टीको आन्दोलन जारी रहँदा बिहीबार पनि दिल्लीको जन्तर-मन्तर र आसपासका क्षेत्रमा सुरक्षा व्यवस्था अत्यन्त कडा पारिएको छ।
बंगालबाट एयरलिफ्ट गरेर ल्याइएको केन्द्रीय आरक्षित प्रहरी बल (सिआरपएफ) का सयौं हतियारधारी प्रहरीहरू अहिले जन्तर-मन्तरमा परिचालन गरिएका छन्। यसबाहेक केन्द्रीय सशस्त्र प्रहरी बलका थप ३० कम्पनी सुरक्षाकर्मी परिचालन गर्न गृह मन्त्रालयले स्वीकृत गरेको भारतीय समाचरा संस्थाहरूले लेखेका छन्।
अघिल्लो दिन झडप र तनाव बढेपछि दिल्ली मेट्रो रेल कर्पोरेसनले बिहीबार बिहान ७:३० बजेदेखि राजीव चोक, मन्डी हाउस, सेन्ट्रल सेक्रेटारियट र सुप्रिम कोर्टसहित १६ वटा मुख्य मेट्रो स्टेसनहरू पुनः बन्द गरेको छ। यी स्टेसनहरू बुधबार पनि बन्द गरिएका थिए।
यसैबीच, सिजेपीले बिहीबार बिहानै प्रहरीले आन्दोलनस्थल बाहिर सिसा फुटेको र पूर्ण रूपमा 'क्षतिग्रस्त गाडी' ल्याएर राखेको भन्दै प्रहरीको नियतमाथि प्रश्न उठाएको छ।
शान्तिपूर्ण आन्दोलनकारीलाई बदनाम गराउन प्रहरीले नै उक्त गाडी ल्याएको आरोप सिजेपीको आरोप छ।
बुधबार जन्तर-मन्तरमा आन्दोलन शान्तिपूर्ण रहे पनि संसद मार्ग र कनट प्लेस क्षेत्रमा प्रदर्शनकारी र प्रहरीबीच झडप भएको थियो।
संसद मार्गमा ओर्लिएका प्रदर्शनकारीलाई तितरबितर पार्न प्रहरीले अश्रुग्यास प्रहार गरेको थियो भने प्रदर्शनकारीका तर्फबाट ढुंगामुढा भएको थियो। झडपमा दुई जना एसिपी सहित ५ जना प्रहरी जवान घाइते भएका छन्।
सिजेपीका संयोजक अभिजीत दिप्केले जन्तर-मन्तर क्षेत्रमा इन्टरनेट सेवा बन्द गरिएको जनाउँदै सरकारले पुनः दमनको तयारी गरिरहेको हो कि भन्दै प्रश्न गरेका छन्।
उनले प्रहरी र अर्धसैनिक बललाई निर्दोष विद्यार्थीमाथि लाठीचार्ज गर्ने 'गैरकानुनी आदेश' नमान्न अपिल पनि गरेका छन्।
शिक्षामन्त्रीको राजीनामा नै 'बटमलाइन'
सिजेपीका प्रवक्ता सौरभ दासले केन्द्रीय शिक्षामन्त्री धर्मेन्द्र प्रधानको राजीनामा नै आफूहरूको मुख्य र अपरिवर्तनीय माग रहेको दोहोर्याएका छन्। यो माग नै सिजेपीको 'बटमलाइन' भएको उनको भनाइ छ।
अस्पतालमा उपचाररत अभियानी सोनम वाङचुकसँग नियमित कुराकानी भइरहेको बताउँदै दासले माग पूरा नभएसम्म आन्दोलन जारी रहने स्पष्ट पारे।
यसैबीच, २५ दिनदेखि अनसनरत सोनम वाङचुकले केन्द्रीय मन्त्रीहरू जेपी नड्डा र जितेन्द्र सिंहले आफूलाई भेटेर प्रश्नपत्र लीक, शिक्षामन्त्रीको राजीनामा र आत्महत्या गरेका विद्यार्थीका परिवारलाई क्षतिपूर्ति दिने विषयमा संसदमा छलफल गर्न सरकार सकारात्मक रहेको आश्वासन दिएको बताएका छन्।
तर आन्दोलनरत कुनै पनि विद्यार्थीमाथि प्रहरी वा कानुनी कारबाही नहुने स्पष्ट लिखित ग्यारेन्टी नआएसम्म अनसन नतोक्ने वाङचुकको अडान छ।
संसदमा सरकारले प्रश्नपत्र लीकबारे छलफल गर्न तयार रहेको बताए पनि विपक्षी दलहरूले भने पहिले शिक्षा मन्त्रीको राजीनामा हुनुपर्ने माग राखेका छन्।
राज्यसभाका विपक्षी नेता एवं कांग्रेस अध्यक्ष मल्लिकार्जुन खर्गेले भने, 'शिक्षामन्त्रीले राजीनामा नदिएसम्म यो विषयमा कुनै निष्पक्ष छलफल हुन सक्दैन।'
विपक्षी सांसदहरूले कालो कपडा लगाएर संसद भवन परिसरमा विरोध प्रदर्शन गरेका छन्। सरकारले भने विपक्षीमाथि विद्यार्थी आन्दोलनलाई राजनीतिको विषय बनाएको आरोप लगाउँदै आन्दोलनकारीसँग वार्ताका लागि सरकारको ढोका सधैं खुला रहेको दाबी गरेको छ।
