सरकार बनाउने र गिराउने खेलमा लागे उठ्नै नसक्ने गरी थचारिने अभिव्यक्ति दिएको भोलिपल्टै नेकपा संयोजक पुष्पकमल दाहाल 'प्रचण्ड' सोही खेलमा लागे।
साउन ८ गते पुष्पलाल स्मृति दिवसमा आयोजित ‘वर्तमान राजनैतिक परिस्थितिमा वामपन्थी दलहरुको भूमिका’ विषयक कार्यक्रममा प्रचण्डले पहिलेजस्तै अब पनि सरकार बनाउने र गिराउने खेलमा लाग्न नहुने बताएका थिए।
तर त्यसको २४ घन्टा नबित्दै प्रचण्ड र एमाले अध्यक्ष केपी शर्मा ओलीबीच प्रदेशहरूमा सरकार बनाउने सहमति भयो।
‘हामीले पहिलेजस्तै अब फेरि सरकार बनाउने र गिराउने खेलतिर लाग्यौं भने अर्को प्रतिक्रान्ति क्रममा हामी सबै उठ्नै नसक्ने गरी थचारिन पनि सकिन्छ,’ प्रचण्डले भनेका थिए, ‘ठूला गफ गर्न छाडौं अब एक्सनमा जाऔं।’
एमाले अध्यक्ष केपी शर्मा ओली र नेकपा संयोजक प्रचण्डबीच शनिबार प्रदेशहरूमा सरकार बनाउने सहमति भएको थियो।
कोशी, बागमती र लुम्बिनी एमालेको नेतृत्वमा, कर्णाली र सुदूरपश्चिम नेकपाको नेतृत्वमा तथा गण्डकी र मधेस अन्य दलको सहयोगमा सरकार बनाउनेतर्फ एमाले र नेकपा छन्।
नेकपा संयोजक प्रचण्डले सरकार बनाउने र गिराउने खेलमा लागे थचारिन सक्ने भने पनि सोही कार्यक्रममा प्रदेशहरूमा सहकार्यको आवश्यकता रहेको र एमालेसँग सहकार्य हुने छनक भने दिएका थिए।
‘प्रदेशहरूलाई बरबाद हुन दिनु हुँदैन, बजेटमा कांग्रेस र एमालेका बीचमा रडाको पर्यो, अनि हामीले त्यहाँ ध्यान दिनुपर्ने भयो। त्यसकारण तत्काल सहकार्य र कार्यगत एकता सम्भव छ, आवश्यक छ,’ प्रचण्डको भनाइ थियो।
एमाले र नेपाली कम्युनिस्ट पार्टीबीच प्रदेशहरूमा मिलेर सरकार बनाउने सहमतिसँगै कम्युनिस्टहरू फेरि मिल्न लागे भन्ने चर्चा छ। त्यसबारे भने प्रचण्डले प्रदेशहरूमा सहकार्य गरेर इमान्दारिताका साथ काम गर्ने हो भने भविष्यमा पार्टी एक हुन वातावरण बन्नेमा जोड दिएका थिए।
‘इमान्दारिताका साथ अघि बढे पार्टी एक हुने वातावरण पनि बन्छ। तर अहिले भर्खरै पार्टी एक हुने स्थिति छैन, त्यता टाउको नदुखाऔं, झमेला,’ उनको भनाइ थियो।
उनले अहिले एमाले-नेकपा मिल्नेतिर जाने हो भने नेताहरूका बीचमा पनि झगडा हुन सक्छ।
‘अहिले पार्टी एक बनाउँछौं भने झगडा सुरू भइहाल्छ, हाम्रो,’ विगतमा माओवादी र एमाले मिलेर नेकपा भएको स्मरण गर्दै उनले भने, ‘मैले पहिले पनि मदन भण्डारीको कार्यक्रमका बेला भनेको थिएँ- पार्टी एकता पहिलाको समीक्षा नगरीकन र अलिकलि अबचाहिँ बिग्रिँदैन भनेर एक हदसम्म सुनिश्चित नगरेसम्म एकता हतारमा गरेर फुर्सदमा पछुताउन अब हुँदैन।’
-1784889080.png)
