सभामुख डोलप्रसाद अर्यालले प्रधानमन्त्री बालेन शाहलाई संसदमा आएर सम्बोधन गर्न आग्रह गरेका छन्।
प्रधानमन्त्री शाहलाई भेटेरै अर्यालले समसामयिक विषयमा सदनलाई सम्बोधन गर्न आग्रह गरेका हुन्।
'मैले प्रधानमन्त्रीलाई समसामयिक विषयमा सदनमा सम्बोधन गर्नुस् भनेँ', भेटबारे अर्यालले पत्रकारहरुसँग भने, 'प्रधानमन्त्रीले विचार गर्छु, भन्नुभयो।'
सभामुख अर्यालले भेटमा भएका थप कुराकानीबारे भने केही खुलाएनन्।
प्रतिनिधि सभाको बैठकमा प्रधानमन्त्री शाहले अहिलेसम्म सम्बोधन गरेका छैनन्।
जेठ १७ गते आकस्मिक रूपमा रोष्टममा उक्लिएर प्रधानमन्त्री शाहले सांसदहरूका प्रश्नको सामना गरेका थिए। उक्त प्रश्नोत्तरका क्रममा शाहले 'नेपालले पनि धेरै ठाउँमा भारतको जग्गा मिचेको' टिप्पणी गरेका थिए।
शाहको टिप्पणी प्रतिनिधि सभाको रेकर्डबाट हटाउनुपर्ने र प्रधानमन्त्रीले माफी माग्नुपर्ने अडान विपक्षी दलहरुले लगातार राख्दै आएका छन्। उनीहरूले संसदको बैठक सुरू भएलगत्तै उभिने र सभामुखसँग समय लिएर लगातार प्रधानमन्त्रीको अभिव्यक्तिको विरोध गर्ने गरेका छन्।
सभामुख अर्यालले पटक-पटक विपक्षी दलहरूलाई संसदमा विरोध अन्त्य गर्न आग्रह गर्दै आएका छन्। तर दलहरूले अडान छाडेका छैनन्।
उनीहरूले प्रधानमन्त्रीलाई संसदमा बोलाएर प्रस्टीकरण दिनुपर्ने माग गर्दै आएका छन्। यसअघि रास्वपाका मुख्य सचेतक कबिन्द्र बुर्लाकोटीले प्रधानमन्त्रीलाई संसदमा ल्याउन पहल गर्ने आश्वासन दिएका थिए। तर बुर्लाकोटीको आग्रहका बाबजुद प्रधानमन्त्री शाह संसदमा आएनन्। त्यसपछि विपक्षी दलहरूले सभामुखलाई नै पहलकदमी लिन आग्रह गर्ने गरेका छन्।
'सँधै उठेर ढ्याप ढ्याप गर्न हामीलाई पनि मन छैन। प्रधानमन्त्रीलाई ल्याएर संसदमा जबाफ दिने वातावरण बनाउनुहोस्', कांग्रेस प्रमुख सचेतक बासना थापाले सभामुखसँग सचेतकहरूको छलफलमा भनेकी थिइन्, 'अहिलेकै अवस्था कामय रहँदा हाम्रो विरोध भइरहन्छ।'
दलहरूको आग्रहपछि सभामुख अर्यालले प्रधानमन्त्रीलाई भेटेरै संसदमा बोल्न भनेका हुन् तर प्रधानमन्त्री शाहले सभामुखको आग्रहमा ठोस जबाफ दिएका छैनन्।
प्रधानमन्त्री शाहले संसदसँग दुरी राख्दै आएका छन्। उनी राष्ट्रपतिले नीति तथा कार्यक्रम प्रस्तुत गरिरहँदा बैठक छाडेर हिँडेका थिए। साथै नीति तथा कार्यक्रममा जबाफ दिन गएनन्। अर्थमन्त्री स्वर्णिम वाग्लेलाई जबाफ दिन लगाए।
त्यस्तै प्रधानमन्त्री शाहले प्रतिनिधि सभा नियमावली अनुसार 'प्रधानमन्त्रीसँग प्रश्नोत्तर'मा भाग लिएका छैनन्। आकस्मिक रूपमा सांसदको जेठ १७ गते प्रश्न लिने काम बाहेक शाहले सांसदका प्रश्न सुनेका छैनन्।
शाहले प्रधानमन्त्री निर्वाचित भएदेखि अहिलेसम्म संसदलई सम्बोधन गरेका छैनन्।
प्रधानमन्त्रीको संसदमा उपस्थिति पनि पातलो छ। जेठ १७ गते विवादास्पद अभिव्यक्ति दिएको ४३ दिनपछि उनी २० मिनेट बैठकमा सहभागी भएका थिए।
प्रधानमन्त्री शाह प्रतिनिधि सभाको अहिलेसम्म ३८ दिनमा ४१ वटा बैठक बस्दा केवल ६ दिन मात्र उपस्थित भएका छन्।
