सत्तारूढ दल राष्ट्रिय स्वतन्त्र पार्टी (रास्वपा) का सभापति रवि लामिछानेले मधेसमा उत्पन्न धार्मिक तनावका कारण सिर्जिएको वर्तमान परिस्थितिमा दोषी खोज्नुभन्दा समस्या समाधानमा केन्द्रित हुनुपर्ने बताएका छन्।
बिहीबार सिंहदरबारमा सञ्चारकर्मीसँग कुरा गर्दै उनले यस्तो बताएका हुन्।
घटनाको नैतिक र राजनीतिक जिम्मेवारी कसले लिनुपर्ने हो भन्ने विषयमा समीक्षा गर्न रास्वपा गम्भीर रहेको पनि बताए।
सभापति लामिछानेले तत्काल दोषी को हो भनेर परिस्थितिलाई थप जटिल बनाउनुभन्दा धार्मिक सहिष्णुता कायम गर्नतर्फ ध्यान दिन सबैलाई आग्रह गरे।
उनले सुनसरी र सिरहामा उत्पन्न परिस्थितिबारे मधेसवादी दलहरूसँग परामर्शसमेत गरेका छन्।
उनले भने, 'भएका कमजोरीको समीक्षा पछि गरौंला। कसैले केही कमजोरी गरेको रहेछ भने राजनीतिक र नैतिक रूपमा कहाँ जिम्मेवार गराउने हो, हामी गराऊँला। त्यसमा निर्धक्क रहनुहोला। त्यसकारण अहिले कसले के गर्यो? कसको गल्ती भयो? यो विषयमा हामी समीक्षा गरौंला। अहिले दोषको बाँडफाँट नगरौं। दोष लगाउने कोही मान्छे चाहिएको छ भने मलाई दोष लगाउनुहोस्। म सत्तारूढ पार्टीको सभापति हो। तर अहिले दोषी खोज्ने काम नगरौं।'
सभापति लामिछानेले सरकार मधेससहित पूर्वी जिल्लामा विकसित समस्या समाधान गर्न गम्भीर भएर लागिरहेको समेत बताए।
- नेपाल न्युज एजेन्सी
