सत्तारुढ दल राष्ट्रिय स्वतन्त्र पार्टी (रास्वपा) का सभापति रवि लामिछानेले सुनसरी, सिरहा लगायत पूर्वी मधेसका जिल्लामा बढ्दो धार्मिक तनाव र असहज बन्दै गएको सुरक्षा अवस्थाबारे मधेसवादी दलका नेताहरूसँग छलफल गरेका छन्।
धार्मिक विवादका कारण उत्पन्न तनाव न्यूनीकरण, साम्प्रदायिक सद्भाव कायम राख्ने उपाय तथा सरकारले तत्काल चाल्नुपर्ने कदमबारे बिहीबार सभापति लामिछानेले मधेसवादी दलहरूसँग परामर्श गरेका हुन्।
राष्ट्रिय मुक्ति पार्टीका अध्यक्ष राजेन्द्र महतोले रास्वपा सभापति लामिछानेले समस्या हल गर्न सुझाव मागेको बताए।
उनले मधेसमा तनाव बढिरहँदा पनि प्रधानमन्त्री र गृहमन्त्री मौन बसेको भन्दै सरकारको आलोचनासमेत गरे। हिंसात्मक गतिविधिमा संलग्नमाथि कानुनी कारबाही गर्न तथा मधेसमा साम्प्रदायिक सद्भाव कायम राख्दै अवस्था सामान्य बनाउन सरकारले तत्काल प्रभावकारी कदम चाल्नुपर्नेमा जोड दिएको उनले बताए।
'सरकार बिल्कुल संवेदनहीन र गैरजिम्मेवार भएर काम गरिरहेको छ। मधेस जलिरहँदा पनि प्रधानमन्त्रीलाई बोल्ने फुर्सद छैन। गृहमन्त्रीलाई पनि त्यहाँ के भइरहेको छ भनेर हेर्ने फुर्सद भएन। अनि बोल्न र हेर्न फुर्सद नहुने यो कस्तो सरकार हो? अझ मधेसबाट अपार जनमत लिएर बनेको सरकार पनि हो। त्यसैले हिंसात्मक गतिविधिमा संलग्नमाथि कडाभन्दा कडा कारबाही हुनुपर्छ। मधेशमा साम्प्रदायिक सद्भाव कायम राखी परिस्थिति सामान्य बनाउन सरकारलाई निर्देशन दिन्छौं भन्नुभएको छ,' महतोले भने।
राष्ट्रिय जनमोर्चाका अध्यक्ष चन्द्रकान्त (सिके) राउतले पाँच दिनसम्म पनि शव व्यवस्थापन हुन नसक्नु सरकारको गम्भीर कमजोरी भएको भन्दै यस्ता विषयमा सरकार गम्भीर हुनुपर्ने विषयमा ध्यानाकर्षण गराएको बताए।
गोली चलाएको विषयमा सुरक्षाकर्मीको बयानले समेत तनाव बढिरहेको भन्दै राउतले सरकारले स्पष्टीकरण दिनुपर्ने कुरा छलफलमा राखेको बताए। छलफलमा सभापति लामिछानेले सरकारलाई आवश्यक निर्देशन दिने बताएको राउतको भनाइ छ।
'रास्वपाका सभापतिज्यूले उत्पन्न समस्यालाई कसरी हल गर्न सकिन्छ भनेर हामीहरूसँग सुझाव लिनुभयो। एकदमै सकारात्मक पहल रह्यो। हामीले सरकारले तत्काल लिनुपर्ने कदमका बारेमा सुझाव दिएका छौं। जस्तो कि पाँच दिनसम्म पनि लाश उठ्न सकेन। यस्तो कुरा त एक–दुई दिनमै व्यवस्थापन गरिसक्नुपर्थ्यो। अर्को कुरा, सुरक्षाकर्मीले आफूहरूले गोली नचलाएको बयान दिँदा दोष अर्को समुदायमाथि गइरहेको देखिन्छ। त्यस कारण यस्तो हुनु हुँदैन। र सरकारका प्रवक्ताले बाहिरका सबै भ्रम चिर्ने गरी बोल्नुपर्छ भनेर नै हामीले सुझाव दिएका छौं,' उनले भने।
छलफलमा जसपा नेपालका अध्यक्ष उपेन्द्र यादव, राष्ट्रिय मुक्ति पार्टीका राजेन्द्र महतो लगायत अन्य मधेसवादी दलका नेताहरू समेत सहभागी थिए।
- नेपाल न्युज एजेन्सी
