नेपाली कम्युनिस्ट पार्टी (नेकपा)का नेता वर्षमान पुनले अहिलेको सरकार विरूद्ध जनताहरू सडकमा आउने बताएका छन्।
नेकपाको गण्डकी प्रदेश सम्पर्क समितिले शनिबार काठमाडौंमा गरेको कार्यक्रममा बोल्दै पुनले सरकारको स्वेच्छाचारी, निरंकुश र गैरजिम्मेवारीविरूद्ध दसैँ, तिहार र छठपछि जनताले ठूलो विद्रोह गर्ने उनको भनाइ छ।
विद्रोहमा ओर्लिएका जनताको नेतृत्व कसरी गर्ने भन्नेबारे अहिल्यैदेखि तयारी गर्न नेता पुनले पार्टी पंक्तिलाई आग्रह पनि गरे।
उनले जनताले विद्रोह गर्नुको कारण पनि सुनाए।
'३५ वर्षमा के गरे भनेर प्रश्न गर्नेहरुको सरकारले रसुवा बाढीपछि उद्धार र राहतमा के गरे? जनताको चुल्होमा ग्यास छैन, के गरे ? किसानलाई मल छैन, के गरे? महँगीले आकास छोएको छ, के गरे?’, पुनले भने, ‘यो स्वेच्छाचारी, निरंशुक र असफल सरकारविरुद्ध जनतामा व्यापक आक्रोश र निराशा बढेको छ, दशैं, तिहार र छठपछि जनता स्वतः स्फुर्त रुपमा विद्रोहका लागि सडकमा आउँछन्, हामीले त्यसको व्यवस्थापनका लागि आफूलाई तयारी अवस्थामा राख्नुपर्ने भएको छ।’
सरकारको गलत रबैका कारण राष्ट्रियता र राष्ट्रिय स्वाधीनता समेत कमजोर भएकाले यसको रक्षाका लागि जनताले विद्रो गर्ने समय आएको उनको दाबी छ।
यस्तै उनले बितेको ३५ वर्षलाई देशको अभिसापका रुपमा व्याख्या गरेर जनता भड्काउनेहरुको सरकारले त्यही ३५ वर्षमा मुलुकको उच्च प्रशासनिक र सैनिक नेतृत्वमा रहेर हालीमुहाली गरेकाहरुलाई खोजीखोजी महत्वपूर्ण जिम्मेवारी दिइरहेको उल्लेख गरे।
पछिल्लोपटक भएको राजदूत नियुक्तिमा अधिकांश त्यस्ता व्यक्तिहरुले अवसर पाएको उनको भनाइ थियो।
पुनले आफूहरुले पार्टी पुनर्गठन र सुदृढीकरण, बाम शक्तिबीच एकता, लोकतान्त्रिक शक्तिबीच सहकार्य र व्यवस्था तथा संविधानको रक्षाका लागि अन्तर्राष्ट्रिय जनमत निर्माणको कामलाई एकैसाथ अघि बढाइरहेको बताए।
रास्वपाले ‘थ्री डी’ अर्थात ‘युथ डेमोग्राफी’, ‘डिजिटल ट्रान्सफर्मेशन’ र ‘डायसपोरा’ मार्फत एकै साथ स्थापित पार्टीहरुविरुद्ध ३५ वर्षमा केही पनि भएन भनेर भ्रम फैलाउन सफल भएको उनको दाबी थियो।
अब नेकपाले पनि ती क्षेत्रमा बलियो उपस्थिति जनाउने कार्ययोजनासहित अघि बढेको उल्लेख गरे।
आगामी महाधिवेशनपछि पार्टीका सबै संरचनामा ५० प्रतिशत युवा सहभागिता सुनिश्ति गर्नुका साथै रोजगारी वा अध्ययनको सिलसिलामा विश्वभर छरिएका नेपालीका एजेण्डा बोक्ने उनको भनाइ छ।
नेपालको जनसंख्याको ४५ प्रतिशत हिस्सा १५ देखि ३९ वर्ष उमेर समूहले ओगटेको भन्दै उनले त्यो समूहलाई नेतृत्वदायी भूमिकामा ल्याउने गरी आफूहरुले बहस गरिरहेको उनले बताए।
-1746009348.jpg)
