नेकपा एमालेका नेता प्रदीप ज्ञवालीले सहकारी ठगीमा संलग्न जोकोहीलाई पनि कारबाहीको दायरामा ल्याउनुपर्ने बताएका छन्।
राष्ट्रिय जनमोर्चाका महासचिव मनोज भट्टद्वारा लिखित सहकारी ठगीसम्बन्धी पुस्तक विमोचनमा बोल्दै उनले राजनीतिक संरक्षणको आधारमा ठगलाई जोगाउन नहुने बताएका हुन्।
‘जसले ठगेका छन्, बिनामुलाहिजा उनीहरुलाई कारबाही गर्ने कुरा जरुरी छ, अहिले सहकारी पीडितहरुले जे आन्दोलन गरिरहनुभएको छ, त्यसप्रति हाम्रो ऐक्यबद्धता छ,' उनले भने।
तर राष्ट्रिय स्वतन्त्र पार्टी (रास्वपा)ले सहकारी ठगीमा संलग्न पार्टी सभापति रवि लामिछानेलाई जोगाउन देशव्यापी आन्दोलन नै गरेको आरोप लगाए।
ठगीमा संलग्नलाई जोगाउन आन्दोलन गर्ने रास्वपा पहिलो पार्टी भएको उनको भनाइ छ।
'सहकारी ठगीमा विभिन्न पार्टीका मान्छेहरु कारबाहीमा परे। अरु पनि थुनिए तर कसैले चाहिँ वक्तव्यसम्म पनि निकालेनन, कानुनलाई सहयोग गरे। तर एउटा यस्तो पार्टी आयो जसले आफ्नो सभापति थुनिएपछि देशव्यापी रुपमा आन्दोलन गरेर उपद्रव गर्ने कामहरु गर्यो। यो ढङ्गको एउटा विकृति पछिल्लो समय देखा परेको छ । यो एकदमै गलत कुरा हो,' उनले भने।
उनले आफ्नो पार्टीसँग जोडिएका र सहकारी ठगीमा संलग्न भएको पाइएका इच्छाराज तामाङ, ढोरपाटनका मेयर देवकुमार नेपाली र सहकारी विभागका पूर्वप्रमुख केबी उप्रेतीलाई कारबाही गरेको उल्लेख गरे।
'जहाँसम्म हाम्रो कुरा हो, इच्छाराज तामाङजी हामीसँगै कुनैबेला जोडिनुभएको हुनाले मैले दुई–तीनवटा कुराहरु प्रस्ट गरौँ । पहिलो कुरा, जुन औंलामा विष लाग्छ त्यही औंला झर्छ । नेकपा एमालेका ५–६ लाख पार्टी सदस्यमध्ये सबै मान्छे असल नै छन् भन्ने म दाबी गर्दिनँ । तर गल्ती गरेको थाहा पाउँदा चाहे इच्छाराज तामाङजी होस्, चाहे ढोरपाटनको मेयर देवकुमार नेपालीजी होस्, चाहे हाम्रो सहकारी विभागमा हुनुहुन्थ्यो केबी उप्रेतीजी होस्, या अरु कोही होस्,' उनले भने।
उनले पहिले नै टेस्ट गरेर कुन मान्छे ठीक भन्ने थाहा पाउन गाह्रो हुने बताए। 'तर मान्छे व्यवहारमै चिनिने हो । सकभर गल्ती नगरुन्, गल्ती गरेको खण्डमा बिनामुलाहिजा कारबाही गर्ने नीति सबै पार्टीहरुले अवलम्बन गर्नुपर्छ,' उनले भने।
सहकारी ठगीका कारण सबैभन्दा बढी साना बचतकर्ता पीडित बनेको उनले बताए।
सहकारीबाट रकम लिएर जग्गा कारोबारमा लगाउने प्रवृत्तिले पनि सहकारी क्षेत्रमा थप समस्या देखिएको पनि उनको भनाइ छ।
त्यसकारण सहकारी पीडितको रकम फिर्ता हुने सुनिश्चितताका लागि सरकारले आवश्यक पहल गर्नुपर्ने उनको भनाइ छ। –न्युज एजेन्सी नेपाल
-1746009348.jpg)
