नेपाली कम्युनिष्ट पार्टी (नेकपा) का संयोजक पुष्पकमल दाहाल प्रचण्डले पूर्वप्रधान न्यायाधीश चोलेन्द्र शमशेर जबरालाई पक्राउ गरेर न्यायालयलाई तर्साउन खोजिएको हो भने त्यो सरकारका लागि घातक हुने बताएका छन्।
सोमबार सिंहदरबारस्थित संसद भवन परिसरमा सञ्चारकर्मीसँग कुरा गर्दै दाहालले सुरक्षा थ्रेटको नाममा पूर्वप्रधान न्यायाधीश जबरालाई बिना कारण पक्राउ गरिएको भन्दै आपत्ति जनाए। सरकारले विशिष्ट व्यक्तिहरूलाई पक्राउ गर्ने ‘दुस्साहस’ गरिरहे ठूलो मूल्य चुकाउनुपर्ने उनको भनाइ छ।
‘यदि सरकारले छोरीलाई पिटेर बुहारी तर्साउन खोजेको हो भने यो पनि घातक हुन्छ,’ उनले भने।
दाहालले सुरक्षा थ्रेट भएको भए पक्राउ गर्नुको साटो सम्बन्धित व्यक्तिको घरमा सुरक्षाकर्मी बढाउनुपर्ने बताए।
‘यो सबैले बुझेको छ, सुरक्षा थ्रेट भन्ने कुरा बहानाबाजी हो। यदि त्यसो भने त सुरक्षा बढाइदिने हो नि,’ उनले भने।
उनले पूर्वप्रधान न्यायाधीश पक्राउ गरेर छोड्नुको तथ्य विस्तारै बाहिर आउने बताए। आगामी दिनमा यस्ता घटना नदोहोर्याउन पनि उनले सरकारको ध्यानाकर्षण गराए।
दाहालले संयुक्त राष्ट्रसंघको ८१औं महासभामा प्रधानमन्त्री बालेन्द्र शाहले गरेको सम्बोधन मुलुकले भोगिरहेको समस्याका हिसाबले स्वाभाविक रहेको पनि बताए।
प्रधानमन्त्री शाहको सम्बोधनलाई अनावश्यक रूपमा बढाइचढाइ गर्न नहुने उनको भनाइ थियो।
‘बालेनजीको ठाउँमा अरू कोही गएको भए पनि अहिले बोल्ने त्यही कुरा हुन्थ्यो। बालेन गएर यो कुरा बोले, अरू गएको भए बोल्दैनथ्यो भन्ने कुरा सोचियो भने त्यो पनि सही हुँदैन,’ उनले भने।
-न्युज एजेन्सी नेपाल
-1788334994.jpg)
