गण्डकी प्रदेशका पूर्वमन्त्री राजिव गुरूङ (दीपक मनाङे) नेपाली कांग्रेस प्रवेश गरेका छन्।
निवर्तमान सभापति शेरबहादुर देउवा पक्षले मनाङेलाई पार्टी प्रवेश गराएका हुन्।
मनाङे सोमबार पार्टी प्रवेश गरेका थिए।
१५ औं महाधिवेशन तयारी समिति, सचिवालय समन्वय समितिका संयोजक दीपकप्रसाद कुईकेलले मनाङे कांग्रेस प्रवेश गरेको जानकारी दिए।
‘उहाँ हिजो पार्टी प्रवेश गर्नुभएको थियो, उहाँलाई मनाङ संयोजक बनाइएको छ,’ उनले सेतोपाटीसँग भने।
साथै १५ औं महाधिवेशन तयारी समितिका संयोजक पूर्वमहामन्त्री शशांक कोइरालाले मनाङेलाई मनाङ संयोजक बनाएका हुन्।
मनाङे दुई पटक स्वतन्त्र उम्मेदवार रहेर मनाङबाट प्रदेश सभा सदस्य निर्वाचित भएका थिए।
पछि उनी नेकपा एकीकृत समाजवादीमा पनि सक्रिय भएका थिए।
उक्त पार्टी नेकपा बनेपछि उनी निस्क्रिय रहे। साथै साउन २८ गते निवर्तमान सभापति देउवा स्वदेश फर्किँदा मनाङे स्वागतका लागि त्रिभुवन अन्तर्राष्ट्रिय विमानस्थल पुगेका थिए।
मनाङे नेपाली कांग्रेसको भ्रातृ संस्था नेपाल तरूण दलमा रहेर विगतमा कामसमेत गरेका थिए।
