पूर्वप्रधानन्यायाधीश चोलेन्द्रशमशेर राणाको मोबाइलमा 'टेक्स्ट मेसेजमार्फत सुरक्षा थ्रेट आएको' र त्यसै आधारमा सुरक्षित स्थानमा सारिएको सरकारले जनाएको छ।
सरकारका प्रवक्तासमेत रहेका शिक्षामन्त्री सस्मित पोखरेलले सोमबार मन्त्रिपरिषद निर्णय सार्वजनिक गर्ने क्रममा उक्त दाबी गरेका हुन्।
उनले राणालाई पक्राउ नगरिएको र नियन्त्रणमा समेत नलिएको पनि बताए।
'पूर्वप्रधानन्यायाधीश चोलेन्द्रशमशेरबारे प्रश्न सबैतिरबाट आएको छ। स्पष्ट भइ नै सकेको छ, उहाँलाई पक्राउ गरिएको पनि होइन, नियन्त्रणमा लिएको पनि होइन,' पत्रकारहरूको प्रश्नमा उनले भने।
मन्त्री पोखरेलका अनुसार राणाको परिवारले सुरक्षाका लागि प्रहरी कार्यालयमा निवेदन दिएपछि उनलाई सुरक्षित स्थानमा लगिएको हो।
'उहाँको परिवारबाट थप सुरक्षा माग गरेर प्रहरी कार्यालयमा निवेदन पठाउनुभएको छ, उहाँलाई सुरक्षा दिन उद्धार गरिएको हो, पक्राउ गरिएको होइन,' उनले भने, 'त्यस कुराको पुष्टि उहाँहरूले सुरक्षा माग गरेर निवेदन दिएकाले नै गर्छ।'
तर राणाको मोबाइलमा कस्तो सुरक्षा थ्रेट आएको थियो र त्यो कसले पठाएको थियो भन्नेबारे सरकारले खुलाएको छैन।
मन्त्री पोखरेलले उक्त थ्रेट 'जेनजी' बाट आएको भन्ने कुरा सरकारले नभनेको पनि स्पष्ट पारे।
'उहाँको फोनमा टेक्स्टमार्फत सुरक्षा थ्रेट आएको थियो, जेनजीबाट होइन,' उनले भने।
