प्रतिनिधि सभाको राज्य व्यवस्था तथा सुशासन समितिको बैठक तत्काल बोलाएर पछिल्लो समय सरकार र राज्यका विभिन्न निकायसँग जोडिएका विवादित घटनाक्रमबारे छलफल गर्न नेपाली कांग्रेसले माग गरेको छ।
समितिमा रहेका कांग्रेसका ४ जना सांसदहरूले तत्काल बैठक बोलाउन माग गर्दै समिति सभापति हरि ढकाललाई पत्र पठाएका हुन्। यसअघि समिति बैठक राख्न नेकपा र राप्रपा सांसदले पनि पत्राचार गरेका थिए।
राज्य व्यवस्था समितिमा कांग्रेसबाट सांसदहरू अर्जुननरसिंह केसी, निश्कल राई, भीष्मराज आङदेम्बे र रेखा कुमारी यादव छन्। उनीहरूले समितिका सभापतिसमक्ष निवेदन दिँदै बैठक बोलाउन माग गरेका हुन्।
उनीहरूले बिचौलिया भनिएका इनम सापकोटा प्रकरणमा राज्य संयन्त्रको दुरूपयोग, प्रहरी हिरासतमा रहेका व्यक्तिको फोन तथा अडियो अनधिकृत व्यक्तिको पहुँचमा पुगेको विषय र अनुसन्धानको निष्पक्षतामाथि प्रश्न उठाएका छन् ।
निवेदनमा अनुसन्धानका क्रममा रहेका व्यक्तिसँग सम्बन्धित प्रमाणमा अनधिकृत पहुँच पुर्याइएको र प्रमाण नष्ट गर्ने कार्य भएको विषयमा सत्यतथ्य छानबिन गर्नुपर्ने माग गरिएको छ।
साथै, प्रधानमन्त्री बालेन शाह तथा प्रधानमन्त्री कार्यालयसँग निकट रहेको भनी इनम सापकोटाले गरेका दाबी र गतिविधिबारे पनि स्पष्ट पार्नुपर्ने उनीहरूको माग छ ।
त्यस्तै, नेपाल प्रहरीका महानिरीक्षक दानबहादुर कार्कीलाई कार्यकाल बाँकी रहँदै प्रधानमन्त्रीको सुरक्षा सल्लाहकार नियुक्त गरी डा. मनोज केसीलाई प्रहरी महानिरीक्षक बनाइएको विषयमा पनि सांसदहरूले प्रश्न उठाएका छन् । प्रहरी नेतृत्व परिवर्तन गर्नुको कारणबारे सरकार र गृह मन्त्रालयसँग जबाफ माग्नुपर्ने उनीहरूको भनाइ छ ।
यसैगरी, सञ्चारगृह र पत्रकारलाई पक्राउ गर्ने तथा केही समयपछि रिहा गर्ने घटनाले स्वतन्त्र प्रेसको अधिकार र राज्यशक्तिको प्रयोगमाथि प्रश्न उठाएको निवेदनमा उल्लेख छ ।
सांसदहरूले यी विषयमा छलफल गर्न प्रधानमन्त्री, गृहमन्त्री, गृहसचिव र नेपाल प्रहरीका महानिरीक्षकलाई समितिको बैठकमा अनिवार्य उपस्थित गराई जबाफ माग्न आग्रह गरेका छन् ।
प्रतिनिधिसभा नियमावली, २०८३ को नियम १७८ अनुसार निवेदन पेस गर्दै उनीहरूले राज्यका निकायलाई संसद्प्रति जबाफदेही बनाउन तथा आवश्यक छानबिन र निर्देशनका लागि अविलम्ब समितिको बैठक बोलाउन माग गरेका हुन्।
-ink-1777278594.jpeg)
