सत्तारूढ रास्वपा सभापति रवि लामिछानेले नेपाली कांग्रेस र कम्युनिस्ट पार्टीहरूको उदाहरण दिँदै रास्वपाका कार्यकर्ताहरूलाई निष्ठाको राजनीति गर्न भनेका छन्।
रास्वपामा वडा सदस्य, वडाध्यक्षका लागि उम्मेदवार हुने आकांक्षी कम रहेको, सिधै मेयर तथा प्रदेश सांसदका आकांक्षी देखिएकोतर्फ लक्ष्य गर्दै सभापति लामिछानेले 'वडाध्यक्ष हुन म नै सांसदबाट राजीनामा दिएर आउनुपर्लाजस्तो छ' भनेका थिए।
सभापति लामिछानेले शुक्रबार चितवनमा भएको कार्यक्रमबाट पार्टी कार्यकर्ताहरूलाई एउटा चुनावको नतिजा मात्र नहेर्न र निष्ठाको राजनीति गर्न आह्वान गरेका हुन्।
‘वडाध्यक्षमा निवेदन हालेको मैले देखिनँ, एकैचोटि मेयर, कहाँ वडाध्यक्ष हुने? एकैचोटि माननीय, वडा कसले हेर्छ? देश नै बनाउने हो वडा के बनाउने होइन त? यसले के देखाउँछ भने हामी अवसरको राजनीतितर्फ गइरहेका छौं, देखाउन त हामी देखाउँदैनौं तर छर्लङ्गै देखियो,’ सभापति लामिछानेले भने।
सभापतिले ठूलो त्याग गर्ने गरेको भनेर कुरा गर्ने र उदाहरण दिने गरे पनि कुनै पद छाड्न भन्दा कार्यकर्ताहरूबीच झगडा हुने गरेको पनि उनले बताए।
‘सभापतिले ठूलो त्याग गर्नुभयो भन्नुहुन्छ। भोलि दुई जना साथीलाई एक जनाले छाडिदिनुपर्यो भन्नुस् त हानाहान हुन्छ,’ उनले भने, ‘नदिनुस् मेरो त्यागको उदाहरण तपाईंलाई अनुसरण गर्नु छैन भने।’
यसपछि उनले नेपाली कांग्रेस र कम्युनिस्ट पार्टीहरूको उदाहरण दिए।
‘नेपाली कांग्रेस २०१५ सालमा सरकारमा गयो त्यसपछि २०४६/०४७ सालसम्म ३० वर्ष कांग्रेस सरकारमा गएन। तर ती मानिसहरू निरन्तर संघर्षमा लागिरहे, तिनलाई थाहा थिएन त्यत्रो शक्तिशाली पञ्चायत ढल्छ कि ढल्दैन, तर उनीहरूले अनवरत संघर्ष गरे,’ सभापति लामिछानेले भने।
यसपछि उनले कम्युनिस्ट पार्टीका नेताहरूको संघर्षको उदाहरण दिए। ‘हिजो थाहा थिएन निर्वासित बस्नुपर्ने परिस्थितिबाट उनीहरू गु्ज्रिए। के तपाईं हामीजस्तो टिकट पाइएन भने त छाडिदिने हो, हराउने हो भनेर यस्तो राजनीतिक विचलन ४ वर्षभित्र आएको भए यो देशमा प्रजातन्त्र आउँथ्यो?, यो देशमा लोकतन्त्र आउँथ्यो?’ उनले कार्यकर्ताहरूलाई लक्ष्य गर्दै सोधे।
सभापति लामिछानेले 'निष्ठामा अडिएको छैन भने राजनीतिमा लाग्न हुँदैन' पनि भनेका छन्। ‘सफलता प्राप्त भएको छ, १८२ सिट छ। भोलि २ सिट त के शून्य सिट भए पनि राजनीति जित्नुपर्छ, चुनाव जित्ने ठूलो कुरा होइन साथीहरू हो,’ उनले भने।
-1791182030.png)
