राष्ट्रिय प्रजातन्त्र पार्टी (राप्रपा) का नयाँ पुस्ताका नेताहरू चार दिने तराई–मधेस यात्रामा निस्कने भएका छन्।
अध्यक्ष राजेन्द्र लिङ्देननिकट दोस्रो पुस्ताका युवाहरू प्रमुख सचेतक खुस्बु ओलीको नेतृत्वमा मधेस यात्रामा जान लागेका हुन्।
टोलीले तराई–मधेसका आठ जिल्लामा विभिन्न कार्यक्रम तथा भेटघाट गर्ने पार्टीले जनाएको छ।
यात्राका क्रममा स्थानीय नेता तथा कार्यकर्तासँग छलफल र अन्तरक्रिया हुनेछ।
यात्राको मुख्य उद्देश्य राप्रपाका अघिल्लो पुस्ताका नेताहरूको हालैको मधेस भ्रमणपछि उत्पन्न भएका 'भ्रम' हटाउने, पार्टीको नीति, विचार र सिद्धान्तबारे स्पष्ट पार्ने तथा राष्ट्रिय राजनीतिमा राप्रपाको भूमिका र औचित्यबारे छलफल गर्ने रहेको नेताहरूले जनाएका छन्।
मधेस यात्रामा काठमाडौं क्षेत्र नम्बर ६ बाट उम्मेदवार बनेका उद्धवराज भेटुवाल, धनकुटाबाट उम्मेदवार बनेका विभत्सु थापा, प्रवास विभाग प्रमुख आनन्द अधिकारी, सहायक प्रवक्ता पूर्ण चन्द र किसान संगठनका प्रेम फुयाललगायत नेताहरू सहभागी हुनेछन्।
यात्राको कार्यक्रमअनुसार मंसिर १ गते सप्तरी र सिराहा, मंसिर २ गते धनुषा र महोत्तरी, मंसिर ३ गते सर्लाही र रौतहट तथा मंसिर ४ गते बारा र पर्सामा टोलीले कार्यक्रम गर्नेछ।
