प्राध्यापक डाक्टर गोविन्द केसी अनशनरत खलङ्गास्थित कर्णाली स्वास्थ्य विज्ञान प्रतिष्ठानमा गोली चलेको विद्यार्थीले बताएका छन्। डा. केसीको स्वास्थ्य अवस्था गम्भीर भएपछि उनलाई काठमाडौं लिन गएको सरकारी टोली, प्रहरी तथा विद्यार्थी र केसीका समर्थकबीच झडपका क्रममा गोली चलेको उनीहरूले बताए।
डा गोविन्द केसीसम्म प्रहरीलाई पुग्न नदिन अस्पतालको सिँडी र हलमा विद्यार्थीहरू बसेका थिए। सिँडीको चेन गेट लगाएका थिए। प्रहरीले लाठी चार्ज गरेर सिँडीका विद्यार्थीलाई तितरवितर पार्यो । चेन गेट फुटाएर हलमा प्रहरी पुग्यो। हलमा विद्यार्थीमाथि बल प्रयोग गर्ने क्रममा विद्यार्थीसँगै सादा पोसाकमा बसेका प्रहरी जवान कमल उपाध्यायमाथि गोली लागेको त्यहाँ उपस्थित विद्यार्थीले बताए। प्रहरीले चलाएको गोलीबाट सादा पोशाकमा रहेका प्रहरीनै घाइते भएको विद्यार्थीहरूले बताएका छन्।
तर जिल्ला प्रहरी कार्यालय जुम्लाका प्रमुख डिएसपी तपन दाहालले भने गोली नचलेको बताए। उनले सादा पोशाकमा रहेका आफ्ना प्रहरी जवानको छातिमा सिसाको टुक्रा पसेको दाबी गरे।
यस्तै प्रहरीले बल प्रयोग गर्दा तीन जना डाक्टर गम्भीर घाइते भएका छन्। घाइते हुनेमा डा. सन्दिप श्रेष्ठ, डा. सिद्धार्थ खाती र उमेश काफ्ले छन्। उनीहरू सबैको अहिले प्रतिष्ठानकै बेडमा राखेर उपचार भइरहेको प्रतिष्ठानकी नर्स सपना साहीले सेतोपाटीलाई जानकारी दिइन्।
यस्तै प्रहरीको लाठी प्रहारबाट दर्जनौ विद्यार्थी र विरामी कुरूवा घाइते भएका छन्। घाइतेहरुले अहिले प्रतिष्ठानको इमर्जेन्सी वार्ड भरिएको छ।
