दुई नाबालक सन्तान सहित भेरी नदीमा हामफालेकी आशंका गरिएकी आमाको शव फेला परेको छ।
दुई सन्ताको अवस्था भने अझै अज्ञात छ। सुर्खेतको गुर्भाकोट गाउँपालिका–१२ पिप्लेकी ३८ वर्षीया माया कठायतको शव सोमबार बेलुकी नदीमा फेला परेको हो।
उनका दुई सन्तानहरू ११ वर्षीया छोरी र ५ वर्षीय छोराको अवस्था अझै अज्ञात छ।
श्रीमती सहित आफ्ना दुई सन्तान बेपत्ता भएकोबारे ३७ वर्षीय श्रीमान भूपेन्द्र कठायतले आइतबार बेलुकीपख प्रहरी चौकी गुमीमा खबर गरेका थिए। त्यसपछि स्थानीय र प्रहरीले उनीहरूको खोजी थालेका थिए।
सुर्खेतका प्रहरी प्रवक्ता डिएसपी मोहनजंग बुढथापाका अनुसार सोमबार दिउँसो जिल्लाको लेकबेँसी नगरपालिका–३ पटारेस्थित भेरी नदीमा मायाको शव फेला परेको हो।
गुर्भाकोट नगरपालिका १२ का वडाध्यक्ष तुल्सीप्रसाद शर्माका अनुसार श्रीमान–श्रीमतीको सामान्य विवादपछि माया कठायत बालबच्चा लगेर लेकबेसी – ३ पटारेस्थित काकाको घरमा तीन दिनअघि गएका थिए। भूपेन्द्र रिसाएर गएकी श्रीमती माया र सन्तानलाई ल्याउन भनेर काकाको घरमा शनिबार दिउँसो पख पुगेका थिए।
तर, मायाले आइतबार बिहान मात्रै घर फर्किने भन्दै श्रीमानलाई फकाइदिएकी थिइन्।
वडाध्यक्ष शर्माका अनुसार श्रीमानसँगको सहमति अनुसार आइतबार बिहानै माया सन्तानसहित घरतर्फ जान भनेर लागेकी थिइन्।
तर, उनी घर पुगिनन्। घरदेखि तीन किलोमिटर टाढा भेरी नदी किनारमा कपडा, सल, चप्पल, झोला र एउटा मोबाइल फेला परेपछि आशंका पैदा भएको थियो। त्यसैले खोजी थालिएको थियो। खोजीका क्रममा सोमबार मायाको शव फेला परेको हो।
प्रहरीले घटनाबारे थप अनुसन्धान हुन जारी रहेको बताएको छ।
-1746009348.jpg)
