बेलायती कलाकार रोवन एटकिन्सन अर्थात् 'मिस्टर बिन' का छोरा बेन्जामिन बेलायती सेनाको गोर्खा रेजिमेन्टमा आवद्ध भएका छन्।
यसनिम्ति बेन्जामिन तीन महिना नेपाल बसेको सञ्चारमाध्यमहरूले जनाएका छन्।
२६ वर्षीय बेन्जामिन बेलायती सेनाका लेफ्टिनेन्ट हुन्। गोर्खामा आवद्ध हुन नेपाली भाषा र संस्कृति बुझ्नुपर्ने मापदण्ड अनुरूप उनी नेपाल आएका थिए।
तीन महिना नेपाल बसाइ क्रममा उनले नेपाली भाषा राम्ररी सिकेको र यहाँको संस्कृतिबारे बुझेको बताइएको छ।
उनले नेपाली गोर्खाहरूका योगदानका बारेमा पनि जानकारी लिएका गोर्खा ब्रिगेड एसोसिएसनको विज्ञप्तिमा उल्लेख छ।
बेन्जामिनले यहाँका स्थानीय नाच पनि सिकेको बताइएको छ। विज्ञप्तिमा उल्लेख छ- लेफ्टिनेन्ट एटकिन्सनले नेपाली भाषा एकदमै चाँडै सिके। यसअघि स्पेनी र अरबी सिकेकाले पनि होला। उनले नेपाली गीत 'उठ्यो-बस्यो' मा उठ्दै-बस्दै नाचेको साँच्चै प्रशंसनीय छ।'
बेलायतमा गोर्खा रेजिमेन्ट सेना सम्मानीय मानिन्छ।
बेन्जामिनका बुबा रोवन अर्थात् 'मिस्टर बिन' संसारभर चर्चित कलाकार हुन्। रोवनले मेक-अप आर्टिस्ट सुनेत्रा शास्त्रीसँग बिहे गरेका थिए।
सन् २०१५ मा उनीहरूको सम्बन्ध विच्छेद भएको थियो। रोवन र सुनेत्राका बेन्जामिन र लिली गरी दुई सन्तान हुन्।
बेन्जामिनले रोवनका फिल्ममा 'बडी डबल' का रूपमा काम गरेका पनि अन्तर्राष्ट्रिय सञ्चारमाध्यमले जनाएका छन्। उनी आफ्ना बाबुजस्तै देखिन्छन्।