पशुपति क्षेत्र विकास कोषले सेवासुविधा वृद्धि गरेपछि पशुपति आर्यघाटमा शवदाह गर्ने कामदारहरूले आन्दोलन फिर्ता लिएका छन्।
सेवा, सुविधा वृद्धिको माग राखेर बुधबार बिहान ६ बजेदेखि कामदारले शव जलाउन, दाउरा ओसार्न र खाल्डो खन्ने काम ठप्प पारेका थिए।
आन्दोलनरत कामदार र कोषबीच भएको वार्तामा सेवा सुविधा वृद्धि गर्ने सहमति भएपछि आन्दोलन फिर्ता भएको हो।
कोषका सदस्य सचिव प्रदीप ढकालका अनुसार पारिश्रमिक र सुविधा वृद्धि गरिएको छ।
‘एउटा शव जलाएबापत कामदारले एक हजार दुई सय रुपैयाँ पाउँदै आएका थिए। तीन सय रुपैयाँ वृद्धि गरेर एक हजार पाँच सय रुपैयाँ पुर्याइएको छ,’ ढकालले सेतोपाटीसँग भने, ‘अवकाश हुँदा उपदानबापत पाउने रकममा पनि वृद्धि गरेका छौं।’
अवकाश हुँदा एक लाख ५० हजार रुपैयाँ पाउने गरेका कामदारले अबदेखि पाँच लाख रुपैयाँ पाउनेछन्।
‘उहाँहरूको मुख्य माग अवकाश हुँदा पाउने रकम दस लाख रुपैयाँ पुर्याउनुपर्छ भन्ने थियो,’ उनले भने, ‘हामीले पाँच लाख रुपैयाँ पुर्याएका छौं।’ कोषले आठ वर्षपछि कामदारको सेवा सुविधा बृद्धि गरेको हो।
मंगलबार साँझदेखि कामदारहरूले सूचना र कालो ब्यानर टाँसेर माग पूरा नभए बुधबार बिहानदेखि अनिश्चितकालीन काम ठप्प गर्ने बताएका थिए।
कामदारको आन्दोलनले शव जलाउन समस्या हुने देखिएपछि कोषले विद्युतीय शवदाह गृह सञ्चालनमै राखेको थियो भने दाउरामै शव जलाउन खोज्नेलाई वैकल्पिक व्यवस्था गरेर अरू कामदार तयारी अवस्थामा राखेको थियो।
कोषसँग कामदारहरूले वार्ता गरी सुविधा पनि वृद्धि गरेका छन्।
औषधि उपचारका लागि पाँच हजार रुपैयाँ खर्च दिँदै आएको कोषले अबदेखि पन्ध्र हजार रुपैयाँ पुर्याएको हो।
‘दुई लाख रुपैयाँ बराबरको बीमा गर्ने पनि सहमति भएको छ,’ उनले भने।
कामदारहरूले सम्बोधन गर्न सकिनेखालका नै मागहरू राखेको ढकालले बताए।
-1746009348.jpg)
