टुँडिखेललाई अतिक्रमणमुक्त गरेर खुला पार्कमा परिणत गर्न सञ्चालित ‘मुक्त टुँडिखेल’ अभियानअन्तर्गत भोलि शनिबार साहित्यिक जमघट हुँदैछ।
टुँडिखेलस्थित खरीको बोटमा बिहान ८ बजेबाट सुरू हुने कार्यक्रममा ३२ जना कविहरूले विभिन्न भाषामा कविता वाचन गर्ने छन्।
आयोजकका अनुसार दुर्गालाल श्रेष्ठ, देवी नेपाल, रामप्रसाद ज्ञवाली, प्रभा भट्टराई, श्रवण मुकारूङ, विप्लव प्रतीक, विप्लव ढकाल, नवराज पराजुली, रञ्जु दाहाल, बलराम दाहाल, रूपक अलंकार, आनन्दसिद्धि तुलाधर, भोला बराल, राजभाइ जक:मि लगायत कवि कार्यक्रममा सहभागी हुँदै छन्।
त्यस्तै, विष्णुकुमार सिंजाली, विजय बलम्ताली, सोम धिमाल, निरज दाहाल, प्रज्ज्वल अधिकारी, असीम सागर, रशिक राज, अच्यूत घिमिरे, रूपा जोशी, स्नेह सायमी, अरूना पन्त, रुपेश श्रेष्ठ, सरिता आचार्य, प्रकाश अमात्य, दिव्या ताम्राकार, रोनिका श्रेष्ठ, कोषराज न्यौपाने र रमिता बज्राचार्य पनि सहभागी हुने छन्।
संरक्षण अभियन्ताहरूले दुई सातादेखि विभिन्न कार्यक्रम गरेर 'मुक्त टुँडिखेल' अभियान सञ्चालन गर्दै आएका छन्। अघिल्लो साता भद्रकाली मन्दिरनिर रहेको गुरूमापाको रूख छेउमा खरीको बोट रोपिएको थियो। एेतिहासिक महत्व बोकेको यही रूखलाई केन्द्रमा राखेर यसपालि साहित्यिक जमघट गराउन लागेको आयोजकले जनाएको छ।
कुनै समय रानीपोखरीदेखि रंगशालासम्म फैलिएको विशाल टुँडिखेल सेना र महानगरको अतिक्रमण, पसल सञ्चालन, सवारी पार्किङ लगायतले खुम्चिँदै गएको छ। यही अवस्था कायम रहे भविष्यका सन्ततिले काठमाडौंको यो महत्वपूर्ण खुला स्थल गुमाउनु पर्नेछ।
काठमाडौंको बढ्दो प्रदूषण र धूलोधुवाँबीच टुँडिखेल अतिक्रमणमुक्त भए सहरले खुला हावामा सास फेर्न पाउँछ। विज्ञहरू यसलाई काठमाडौंको 'फोक्सो' भन्छन्।
यो चउरलाई पुरानै अवस्थामा फर्काएर हरित पार्कमा परिणत गर्न संरक्षण अभियन्ताहरूले दुई साताअघि खुलामञ्च वरिपरि मानव साङ्लो बनाएर 'मुक्त टुँडिखेल' अिभयान सुरू गरेका थिए।
तीन महिनासम्म चल्ने भनिएको यस अभियानअन्तर्गत कुनै शनिबार चित्रकारहरूलाई निम्ता गरेर आफूले परिकल्पना गरेको खुला टुँडिखेलको पेन्टिङ प्रदर्शन गर्न आह्वान गरिनेछ। कुनै शनिबार नाट्य समूह डाकेर सार्वजनिक जग्गा अतिक्रमणविरूद्ध सडक नाटक प्रदर्शन गर्ने तयारी छ।