साल्ट ट्रेडिङ कर्पोरेसनको विराटनगरस्थित कार्यालयबाट ठूलो परिमाणमा रासायनिक मल बिक्री गर्ने भण्डारण शाखाका तत्कालीन प्रमुखसहित तीन जनाविरूद्ध मुद्दा दायर भएको छ।
अख्तियार दुरूपयोय अनुसन्धान आयोगले तत्कालीन कार्यालय प्रमुख नविनचन्द्र झा, प्रमुख सहायक दिलचन्द्र राई र जुनियर सहायक खगेन्द्र बस्नेतविरूद्ध बुधबार विशेष अदालतमा मुद्दा दायर गरेको हो।
भण्डारण गरिराखेको सहुलियतको रासायनिक मल बिक्री गरेको अभियोग पुष्टि भएपछि तीनै जनालाई मुद्दा दायर गरिएको अख्तियारले जनाएको छ। उनीहरूविरुद्ध १९ लाख ७ हजार ३५० रुपैयाँ बिगो कायम गरी मुद्दा दायर गरिएको अख्तियारले जनाएको छ।
साल्ट ट्रेडिङको तत्कालीन अञ्चल कार्यालय विराटनगरबाट कृषकलाई वितरण गर्न भनी राखिएको सहुलियत दरको मल बिक्री गर्ने गरेको उपर केन्द्रीय कार्यालयले पनि छानबिन गरिरहेको थियो। यही क्रममा अख्तियारले उनीहरूमाथि अनुसन्धान थालेको थियो।
अनुसन्धानबाट बिगो रकम बराबरको मल बिक्री गरेको खुलेको अभियोग पत्रमा उल्लेख छ। राई भण्डारण शाखाका प्रमुख हुन् भने बस्नेत जुनियर सहायक हुन्। तिनै जनालाई साल्ट ट्रेडिङ कर्पोरेसनले निलम्बन गरिसकेको छ।
‘पदीय दायित्व पूरा नगरी नेपाल सरकार वा सार्वजनिक संस्थालाई गैरकानुनी हानी पुर्याउने बदनियतले भ्रष्टाचार निवारण ऐन, २०५९ को दफा १७ बमोजिम कसुर गरेको पुष्टि भएको हुँदा बिगो उन्नाइस लाख सात हजार तीन सय पचास कायम गरी निज प्रतिवादीहरु नविनचन्द्र झा, दिलचन्द्र राई र खगेन्द्र बस्नेत समेतलाई भ्रष्टाचार निवारण ऐन, २०५९ को दफा १७ ले निर्देश गरेअनुसार भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को देहाय खण्ड (च) बमोजिमको सजाय गरी हिनामिना हानि नोक्सानी भएको बिगो असुल गराउन’ अख्तियारले मागदाबी गरेको छ।