नेपाल आदिवासी जनजाति महासंघको ११ औं राष्ट्रिय महाधिवेशन २०८२ साल चैत ५ गते काठमाडौंमा सुरू हुने भएको छ।
महासंघले शुक्रबार पत्रकार सम्मेलनमार्फत राष्ट्रपति रामचन्द्र पौडेलको प्रमुख आतिथ्यतामा दिउँसो १ बजे नेपाल प्रज्ञा प्रतिष्ठान, कमलादीमा उद्घाटन समारोह आयोजना गरिने जनाएको छ।
महाधिवेशनको मूल नारा 'प्राकृतिक स्रोत जल, जमिन र जंगलमाथि आदिवासी जनजातिको अधिकार सुनिश्चित गर, प्राचीन सभ्यता र ऐतिहासिक पृष्ठभूमिको पहिचानका आधारमा प्रदेशहरूको पुनः नामाङ्कन गर' तय गरिएको छ।
पहिलो दिन देशभरका आदिवासी जनजाति समुदाय आफ्ना वेशभूषासहित सांस्कृतिक झाँकी, नाचगान र र्यालीसहित भृकुटीमण्डपबाट नगर परिक्रमा गर्दै कमलादी पुग्ने कार्यक्रम रहेको छ। र्याली भद्रकाली, सुन्धारा, वीर अस्पताल, रत्नपार्क, जमल र घण्टाघर हुँदै प्रज्ञा प्रतिष्ठानमा पुगेर उद्घाटन समारोहमा परिणत हुनेछ।
चैत ६ गते स्वयम्भू स्टार ब्याङ्केट, स्वयम्भूमा महाधिवेशनको बन्द सत्र आयोजना हुने महासंघले जनाएको छ। बन्द सत्रमा देश तथा विदेशका विभिन्न संगठनबाट ५०० भन्दा बढी प्रतिनिधि र पर्यवेक्षक सहभागी हुने बताइएको छ।
महासंघका अनुसार महाधिवेशनलाई सफल बनाउन विभिन्न उपसमितिहरू गठन गरी अन्तिम तयारी भइरहेको छ।
-1746009348.jpg)
