नेपाल भारत सीमा नाका बेलहियामा अलपत्र परेका नेपालीलाई भारतमा र भारतीयलाई नेपालमै क्वारेन्टाईनमा राखेर व्यवस्थापन गर्ने काम सुरू भएको छ।
भारत सरकारले बेलहियाको दशगजा क्षेत्रमा अलपत्र परेका ३ सय नेपालीलाई भारतको नौतनहामा क्वारेन्टाइनमा राख्ने तयारी गरिरहँदा नेपाल सरकारले भने भैरहवामा भारतीय नागरिकलाई क्वारेन्टाइनमा राखिसकेको छ।
नेपालमा विभिन्न क्षेत्रमा काम गर्दै आएका भारतीय मजदुर नेपाल र भारत दुबैतर्फ लक डाउन घोषणा गरेका कारण घर फर्किन नपाएपछि अलपत्र परेका थिए।
सीमाक्षेत्रमा वारि र पारि दुबै देशका नागरिक अलपत्र पर्न थालेपछि दुबै देशका सरकारले आ-आफ्नो देशमा रहेका नागरिकलाई क्वारेन्टाइनमा राख्ने सहमति गरेका थिए।
रूपन्देहीका प्रमुख जिल्ला अधिकारी महादेव पन्थले नेपालमा अलपत्र परेका भारतीय मजदुरलाई क्वारेन्टाइनमा राखिएको र भारतीय भूमिमा अलपत्र परेका नेपालीलाई भारततर्फकै क्वारेन्टाइनमा राखिने सहमति भएको जानकारी दिए।
यसअघि भारतबाट आएका महिला र बालबालिका पनि सीमामा अलपत्र भएको समाचार सार्वजनिक भएपछि प्रदेश सरकारले सीमा रहेका नेपालीलाई समूह बनाएर नेपाल ल्याएर सम्बन्धित पालिकामा क्वारेन्टाइनमा राख्ने निर्णय गरेको थियो। तर नेपाल सरकारले उक्त विषयमा निर्णय नगर्दा प्रदेश सरकारको निर्णय कार्यान्वयन हुन सकेको थिएन।
सोही अनुरूप नेपाली भूमिमा अलपत्र परेका एक सय ५० बढी भारतीय नागरिकलाई भैरहवास्थित प्रतिमान निमा स्मृति प्रतिष्ठानको भवनमा राखिएको छ। निजी क्षेत्रबाट सञ्चालित प्रतिष्ठानले क्वारेन्टाइनका लागि सरकारलाई आफ्नो भवन उपलब्ध गराएको छ।
प्रतिष्ठानकी कार्यकारी निर्देशक स्वाती थापाले समस्यामा परेका नागरिकलाई र सरकारलाई सहयोग गर्नु मानवीय कर्तव्य भएकोले उक्त भवन क्वारेन्टाइनको लागि सरकारलाई उपलब्ध गराइएको जानकारी दिइन्।
प्रतिष्ठानले जिल्ला विपद् व्यवस्थापन समितिलाई १५०० थान सर्जिकल मास्क हस्तान्तरण गर्नुका साथै क्वारेन्टाइनमा बसेकाहरूलाई चिया-नास्ताको समेत व्यवस्था गर्ने जनाएको छ।