स्याङ्जाको भिरकोट नगरपालिका ६ का लिलाप्रसाद पँगेनी र अर्जुनचौपारी गाउँपालिका ५ का प्रताप पौडेलले मलामी जानका लागि भनेर जिल्ला प्रशासन कार्यालय कास्कीबाट चैत २१ गते सवारी पास लिए। उनीहरू मलामी गएनन्, बसमा खचाखच यात्रु राखेर स्याङ्जा पुर्याए।
यात्रुबाट भाडा असुलेर सवारी पासको दुरूपयोग भएको सार्वजनिक भएपछि कास्की प्रहरीले उनीहरूलाई पक्राउ गरेको छ। उनीहरूलाई गत आइतबार पक्राउ गरी कारबाहीका लागि स्याङ्जा पठाएको कास्की प्रहरीका प्रवक्ता डिएसपी राजकुमार केसीले बताए।
यस्तै, चैत १९ गते पर्वतबाट धादिङ गइरहेको एम्बुलेन्स प्रहरीले चेक गर्यो। धादिङको गजुरी गाउँपालिकाको पिँजडा स्वास्थ्य चोकीले चलाएको बा २ झ ३०९८ नम्बरको एम्बुलेन्स र प्राविधिक स्वास्थ्य केन्द्र धादिङबाट संचालित बा २ झ ४३३३ नम्बरको एम्बुलेन्समा १५ जना यात्रु राखेर ओसारपसार गरेको प्रहरीले भेटायो। पोखराको बाग्लुङ सडक खण्डबाट एम्बुलेन्स र चालकलाई प्रहरीले नियन्त्रणमा लिएर कारबाही अघि बढाएको छ।
प्रहरीले बिरामी बोक्न नमान्ने एम्बुलेन्स समेत नियन्त्रणमा लिएको छ। पोखराको मेट्रोसिटी अस्पताल र फेवासिटी अस्पतालका एम्बुलेन्स सेवाग्राहीले बोलाउँदा समेत बहाना बनाएर नआएको भन्दै नियन्त्रणमा लिएको डिएसपी केसीले बताए।
ग १ च ५४९२ र ग १ च २७१४ नम्बरको एम्बुलेन्स र चालकलाई नियन्त्रणमा लिएको उनले जानकारी दिए।
प्रहरीले लकडाउन सुरू भएपछि पोखरामा मात्र २ हजार ३५६ वटा मोटरसाइकल चालकलाई समेत कारबाही गरेको छ।
यस्तै, लकडाउन उल्लङ्घन गरेको भन्दै २४ वटा सवारी साधन चालकलाई कारबाही गरेको प्रहरीले जानकारी दिएको छ । लकडाउन उल्लङ्घन गरी सडकमा हिँड्ने ३ हजार ५७७ जनालाई सचेतनामुलक जानकारी गराएर छाडेको डिएसपी केसीले बताए ।