कुमारी ट्रष्टले कर्णाली प्रदेश अस्पतालका लागि स्वास्थ्य सामग्री सहयोग गरेको छ। शुक्रबार ट्रष्टका अध्यक्ष तथा पूर्व संविधान सभा सदस्य राजीव विक्रम शाहले प्रदेश अस्पताललाई सामग्री हस्तान्तरण गरेका हुन्।
प्रदेश अस्पतालका लागि एउटा भेन्टिलेटरसहित पाँचवटा आइसीयु बेड, इसिजी मेसिन, प्यासेन्ट मनिटरलगायत ७० लाख रुपैयाँ बराबरको अत्यावश्यक सामग्री ट्रष्टमार्फत प्रदान गरिएको अध्यक्ष शाहले बताए।
यस्तै प्रदेशका आठवटा जिल्ला अस्पतालका लागि समेत ट्रष्टमार्फत ३० लाख रुपैयाँ बराबरको सामग्री सहयोग गरिएको छ। सुर्खेत र जुम्लाबाहेक अन्य जिल्ला अस्पतालहरुका लागि स्वास्थ्य सामग्री सहयोग गरिएको हो।
हुम्लामा प्यासेन्ट मनिटर, अक्सिजन कन्सनटेटर, डेलिभरी बेड म्यानुयल सहयोग गरिएको छ। मुगु, डोल्पा, रुकुम पश्चिम र सल्यानका जिल्ला अस्पतालका लागि प्यासेन्ट मनिटर, अक्सिजन कन्सनटेटर प्रदान गरिएको छ।
यस्तै कालिकोट जिल्ला अस्पटालका लागि प्यासेन्ट, अक्सिजन कन्सनटेटर, प्यासेन्ट बेड, दैलेखका लागि डेलिभरी बेड, डेलिभरी भ्याकुप सेट सहयोग गरिएको ट्रष्टका अध्यक्ष शाहले बताए।
योसहित कर्णाली प्रदेशका लागि ट्रष्टका तर्फबाट एक करोड रुपैयाँ बराबरको सामग्री सहयोग गरिएको उनले बताए। कोभिड–१९ को प्रकोपसँग लड्नका लागि अलिकति भएपनि बल पुगोस् भन्ने उद्देश्यले कर्णाली प्रदेशमा स्वास्थ्य सामग्री सहयोग गरिएको उनले बताए।
‘विश्व कोरोना भाइरसको महामारीको समस्यामा परेका बेला, पूर्वाधार अभाव भएका कर्णालीका अस्पताललाई यससँग लड्न सहयोग मिलोस् भन्ने हेतुले स्वास्थ्य सामग्री सहयोग गरेका हौं,’ शाहले भने, ‘हामीले प्रदान गरेका सामग्रीले थोरै भएपनि नागरिकको स्वास्थ्यका लागि सहयोगी हुने विश्वास लिएका छौं।’
उनले आफ्नो ट्रष्टका तर्फबाट प्रदान गरिएको सामग्री सञ्चालनका लागि पनि सहजीकरण हुनेगरी तालिम सञ्चालन गर्ने प्रतिबद्धता जनाएका छन्।
ट्रष्टका तर्फबाट केही दिनपछि कर्णाली स्वास्थ्य विज्ञान प्रतिष्ठानलाई एम्बुलेन्स सहयोग गर्ने पनि उनले बताए।
-1746009348.jpg)
