गुल्मीको कालीगण्डकी गाउँपालिकाले गाउँपालिकाभित्रका सबै घरपरिवारलाई सहकारी संस्थामा आबद्ध हुन अनिवार्य गरेको छ।
पैसा बचत गर्ने बानीको विकास गर्न गाउँपालिकाले प्रतिघरपरिवार मासिक ५ सय रुपैयाँ सहकारी संस्थामा बचत गर्न अनिवार्य गर्न लागेको छ।
गाउँपालिका अध्यक्ष वेदबहादुर थापाले ‘एक घरपरिवार, एक सहकारी संस्था’ योजना अनुसार यसवर्ष सात वटा सहकारी संस्था स्थापना गरिएको जानकारी दिए।
अध्यक्ष थापाले सर्वसाधारणलाई बचत गर्ने बानीको विकास गराउन सहकारीमा न्यूनतम मासिक ५ सय रुपैयाँ भए पनि बचत गर्न अनिवार्य गरिएको जानकारी दिए।
१९ हजार बढी जनसंख्या रहेको गाउँपालिकामा कति परिवार सहकारी संस्थामा आवद्ध हुन बाँकी छन् भनि तथ्यांक संकलन भइरहेको र साउन महिनाको सुरूआतदेखि नै सबैलाई सहकारीमा आवद्ध गराइने जानकारी दिए।
गाउँपालिकाले आर्थिक अवस्था कमजोर भएका घरपरिवारलाई रोजगारी दिएर भए पनि सहकारी संस्थामा मासिक बचत गराउने जनाएको छ।
अध्यक्ष थापाका अनुसार आर्थिक अवस्था कमजोर भएको घरपरिवारलाई गाउँपालिकाले रोजगारी दिने छ भने त्यसैको ज्यालाबाट सहकारीमा बचत गराइने छ।
गाउँपालिकाले रोजगारी नभएका विपन्न गरिब परिवारको लागि दैनिक ६ सय ८० रुपैयाँ ज्याला तय गरी रोजगारी प्रदान गर्दै आएको छ।
अध्यक्ष थापाले सडक, नाली निर्माण, सार्वजनिक भवन निर्माणजस्ता काममा रोजगारी नभएका तथा गरिब तथा विपन्न परिवारलाई प्राथमिकता दिइएको दाबी गरे।
यस्तै, गाउँपालिकाले घरको बनावट तथा प्रकृतिको आधारमा कर असुल गर्ने गरेको छ।
अध्यक्ष थापाले गाउँपालिकाभित्र निर्माण गरिएको एकतल्ले पक्की घरको वार्षिक ५ सय, टिन तथा ढुंगाको छानो लगाएको घरको ३ सय र खरको छानो भएको घरको वार्षिक एक सय रुपैयाँ एकीकृत सम्पत्ति कर लिने गरिएको जानकारी दिए।
-1746009348.jpg)
