नारायणगढ–मुग्लिन सडकखण्डमा चार ठाउँमा ठूला र ठाउँ-ठाउँमा साना पहिरा खसेपछि सडक पूर्ण सञ्चालन गर्न दिनभर लाग्ने भएको छ।
सो सडकको घुमाउने, भालुढुङ्गा, चारकिलो र पाँचकिलोमा ठूला पहिरा खसेका छन्।
डिभिजन सडक कार्यालय चितवनका ई. शिव खनालका अनुसार पहिरो पन्छाउने काम बिहानदेखि सुरू भएको छ। थप पहिरो नखसेमा दिउँसो सम्ममा एकतर्फी सञ्चालन गर्न सकिने भए पनि पूरै सडक सफा गर्न साँझसम्म लाग्ने उनले जानकारी दिए। ती चार ठाउँमध्ये चार किलो र घुमाउनेमा पहिरो पन्छाउने काम भइरहेको छ।
खनालले भने, ‘ती दुई ठाउँमा एकतर्फी भएसँगै उपकरण लगेर बीचका दुई पहिरो पन्छाउँछौं।’
एकतर्फी सञ्चालन गरेर त्यहाँ अड्किएका सवारी साधन पार गराएपछि दुईतर्फी खुलाइने छ।
सोमबार राति सुरूमा १०ः३० बजे चारकिलोमा पहिरो खसेको थियो। रातको समयमा क्रमशः अन्य ठाउँमा पहिरो खसेको खनालले बताए।सोमबार दिउँसो पनि सो सडकखण्डमा पहिरो खसेर सडक अवरूद्ध भएको थियो।
साना पहिरा ठाउँ-ठाउँमा भएकाले सङ्ख्या यकिन गर्न नसकिए पनि ती पहिरो पन्छाउन समय नलाग्ने उनको भनाइ छ।
यसैबीच पाँचकिलोमा माथिबाट झरेको लेदोले सडक भरिएर छेउमा रहेका तीन घरमा लेदो पसेको छ।
इलाका प्रहरी कार्यालय मुग्लिनका प्रहरी निरीक्षक कञ्चन तामाङका अनुसार सडकमा रहेको एउटा बोलेरो लेदोले भरिएको छ। लेदोले अन्य दुई घरको जग खोतलेको तामाङले बताए।
-1746009348.jpg)
