गोरखाको चुमनुव्री गाउँपालिका वडा नम्बर ५ बिहीका अध्यक्ष सोनाम ग्याल्जेन गुरूङलाई प्रहरीले सदरमुकाम झिकाएको छ।
वडाभित्र श्रृंखलावद्ध हत्या भए पनि ती घटनाहरू प्रहरीकहाँ नपुगेको र गाउँमै गुपचुप मिलाउने गरेको खबर सार्वजनिक भएपछि वडाध्यक्षलाई सदरमुकाम बोलाइएको प्रहरीले जनाएको छ।
केही दिनअघि अन्नपूर्ण पोस्टले ‘श्रृंखलावद्ध घटना गुपचुप’ शीर्षकमा बिहीको खबर छापेको थियो।
ती घटनाका सम्बन्धमा सोधपुछका लागि प्रहरीले वडाध्यक्षलाई जिल्ला प्रहरी कार्यालय गोरखा बोलाएको हो।
गोरखाका एसपी सुरेन्द्र गुरूङका अनुसार वडाध्यक्ष गुरूङलाई पक्राउ गरिएको भने होइन।
‘बिहीमा श्रृंखलावद्ध हत्या भएको र ती घटना गाउँमै सामसुम हुने गरेका खबर पत्रिकामा आएपछि त्यसबारे अध्यक्षलाई केही जानकारी छ कि भनेर सोधपुछका लागि मात्रै बोलाएका हौं,’ उनले सेतोपाटीसँग भने, ‘उहाँ माछिखोला आइपुग्नु भएको छ। आज सदरमुकाम आइपुग्नुहोला।’
वडाध्यक्ष गुरूङसँग साथमा प्रहरी भने आएका छैनन्।
बिही गाउँमा विगत १५ वर्षमा आठ वटा घटना भए पनि ती घटनाहरू प्रहरीसम्म पुगेका थिएनन्।
पछिल्लो समय एक साता अगाडि बिहीकी करिब ५० वर्षकी ङिमा साङ्मोको मृत्यु भएको थियो।
कुटपिटबाट उनको मृत्यु भए पनि कुटपिटमा संलग्नलाई कसैले उजुरी गरेन। पीडित पक्षलाई पैसा दिएर घटना गाउँमै गुपचुप मिलाएको आरोप छ।