स्वास्थ्य तथा जनसंख्या मन्त्रालयले अस्पताल भर्ना नभएका कोरोना संक्रमितलाई १४ दिनपछि स्वत: निको भएको सूचीमा गणना गरिरहेको छ।
मन्त्रालयका प्रवक्ता डा. जागेश्वर गौतमले अस्पताल भर्ना नभएका संक्रमितलाई १४ दिनपछि स्वत: निको भएको मानिने जनाए।
उनले भने, 'पोजेटिभ आएको दिनबाट १४ दिनमा अस्पताल भर्ना भएको छैन भने निको भएको मानिन्छ।'
प्रवक्ता गौतमले होम आइसोलेसन वा क्वारेन्टिनमा रहेका संक्रमित १४ दिनसम्म पनि अस्पताल भर्ना नभएको अवस्थामा त्यस्ता संक्रमितलाई निको भएको मानिने बताए।
पछिल्लो समय संक्रमित संख्या बढेको र कतिपयले संक्रमण पुष्टिपश्चात पुनः परीक्षण नगरेका कारण मन्त्रालयसँग नेगेटिभ रिपोर्ट आउने व्यक्तिको यकिन तथ्यांक छैन। त्यसैले मन्त्रालयले संक्रमण पुष्टि भएको १४ दिनपछि स्वत: निको भएको मान्दै आएको छ।
यसले गर्दा निको हुने संक्रमित दरमा समेत प्रभाव परेको देखिन्छ। मन्त्रालयको तथ्यांक अनुसार नेपालमा निको हुने संक्रमितको दर ९०.९ प्रतिशत छ।
सोमबारमात्र एक हजार ९ सय ८० जना नयाँ संक्रमित थपिँदा ३ हजार ४३ जना निको भएका छन्। पछिल्लो समय नयाँ संक्रमित थपिने भन्दा निको हुनेको संख्या बढ्दो छ। तर अधिकारीहरूले परीक्षण कम भएकाले संक्रमण थोरै देखिन थालेको बताएका छन्।
सोमबार पनि मात्र १० हजार जनाको पिसिआर परीक्षण भएको छ। यद्यपि मन्त्रालयले भने दैनिक २६ हजार जनाको परीक्षण गर्न सकिने दाबी गर्दै आएको छ।