महानगरीय प्रहरी प्रभाग बलम्बुस्थित प्रहरीको नियन्त्रणमा रहेका एक युवाको मृत्यु भएको छ।
ब्राउन सुगरसहित समातिएका युवाको गत पुस २९ गते मृत्यु भएको महानगरीय प्रहरी परिसर काठमाडौंका प्रहरी उपरीक्षक दिनेशराज मैनालीले जानकारी दिए।
सुनसरी बराह नगरपालिका-३ चतरा घर भई चन्द्रागिरि नगरपालिका-११ स्थित सतुंगलमा रेष्टुरेन्ट सञ्चालन गर्दै आएका ३६ वर्षीय ओमप्रकाश श्रेष्ठको मृत्यु भएको हो।
उनलाई प्रहरी प्रभाग बलम्बुको टोलीले पुस २८ गते साँझ साढे ६ बजे ब्राउन सुगरसहित नियन्त्रणमा लिएको थियो।
उनलाई र मोरङको विराटनगर महानगरपालिका-१५ घर भई सतुंगल बस्ने २१ वर्षीय निक्सन मल्ल ठकुरीलाई त्यसदिन प्रहरीले पक्राउ मरेको थियो।
उनीहरूलाई प्रहरीले चन्द्रागिरि-११ स्थित बिगमार्ट नजिकैबाट पक्राउ गरेको थियो।
त्यसैक्रममा ओमप्रकाशले आफूसँग रहेको ब्राउन सुगर मुखमा हालेर चपाएको प्रहरी उपरीक्षक मैनालीले बताए।
‘उनले त्यो निलेपछि प्रहरी हवल्दार नवराज बस्नेतले मुखबाट निकाल्न खोजे, तर निकाल्न दिएनन्। बरू प्रहरीको औंला टोके,’ उनले भने।
निकाल्ने क्रममा उनको बायाँ हातको चोर औंला टोकेको उनले बताए। केही बेरमा ओमप्रकाशले प्लास्टिकसहित निलेको ब्राउन सुगर थुकेको प्रहरीले बताएको छ।
उनीबाट १.३ ग्राम र निक्सनबाट १ ग्राम ब्राउन सुगर बरामद गरेको थियो।
यस्तै उनीहरूलाई नियन्त्रणमा लिएपछि उनीहरूको स्वास्थ्य जाँच गराउन लगेको प्रहरी उपरीक्षक मैनालीले बताए।
उनीहरूको उपचारको लागि ओम समाज स्वास्थ्य प्रालिमा लगिएको थियो। त्यहाँ जाँच गराउँदा चिकित्सकलाई पनि ब्राउन सुगर खाएकोबारे जानकारी गराएको र पछि अवस्था सामान्य रहेको हुँदा फिर्ता पठाएको प्रहरीको भनाइ छ।
‘स्वास्थ्य अवस्था सामान्य रहेको भनिएकोले दुबैलाई फेरि बलम्बुको हिरासत कक्षमा राखिएको थियो,’ मैनालीले भने, ‘तर राति साढे ११ बजे ओमप्रकाश बेहोश भए।’
उनी बेहोश भएको हिरासत व्यवस्थापन अधिकृतले थाहा पाएपछि तुरून्तै ओम समाज अस्पतालमा लगिएको थियो।
त्यहाँ उपचार सम्भव नभएपछि मध्यराति उनलाई वीर अस्पतालमा पठाइएको थियो। उपचारको क्रममा वीर अस्पतालमै उनको मृत्यु भएको हो।।
शव परिवारले बुझेर अन्त्येष्टि गरिसकेका छन्। मृत्युको कारणबारे पोष्टमार्टम रिपोर्ट आएपछि थाहा हुने र थप बुझ्न भिसेरा परीक्षण पनि भइरहेको मैनालीले बताए। पोष्टमार्टम गर्न महाराजगन्जस्थित त्रिवि शिक्षण अस्पतालमा पठाएको थियो।
‘पोष्टमार्टम रिपोर्ट आएपछि हामी भीसेरा गर्न पठाउँछौं, त्यसपछि कारण खुल्छ,’ मैनालीले भने, ‘ अन्य केही पनि छैन। यसमा प्रहरीको इन्टेन्सन केही पनि छैन। सबै रिपोर्ट आएपछि मात्रै अरू कुरा भन्न सकिन्छ।’
निक्सन ठकुरी मल्लमाथि भने लागुऔषध मुद्दामा अनुसन्धान अघि बढिरहेको उनले बताए।