मेयर बालेन शाहले काठमाडौं महानगरपालिकाको फोहोरमैला व्यवस्थापनमा एउटा सरकारले अर्को सरकारलाई असहयोग गरी असफल बनाउन राजनीतिक खेल खेलेको टिप्पणी गरेका छन्।
आइतबार उनले आफ्नो आधिकारिक फेसबुकमा लेख्दै यस्तो बताएका हुन्।
बालेनले सबैले कल्पना गरेको सरकारले एकआपसमा समन्वय तथा मेलमिलाप भएको तर अहिले त्यसको विपरीत भई सरकारलाई असहयोग गरी असफल बनाउन खेल किन गरिने भन्दै प्रश्न गरेका छन्।
'हामी त्यति धेरै असभ्य र स्वार्थी किन छौं? फोहोरको रास लगाएर त्योभित्र झन् कुहिएको खेल खेलेर त्यसलाई राजनीतिको नाम नदिऊँ,' उनले लेखेका छन्, 'राजनीति त्यस्तो हुँदैन। त्यस्तो राजनीतिले कसैलाई अगाडि बढाउँदैन। यसमा हेक्का राखौं।'
यस्तै आज काठमाडौंको फोहोर बञ्चरेडाँडामा पुर्याउन दुई पटक अवरोध भएको समेत उनले बताएका छन्। दुईचोटिको अवरोध समाधान गरी अघि बढ्दा तेस्रोपटक पनि अवरोधको कोसिस भएको उनले लेखेका छन्।
'आज दुई स्थानमा अलगअलग कारणले सडक अवरूद्ध गरियो,' उनले भने, 'त्यसैले आज फोहोरका ९० वटा गाडी मात्र बञ्चरेडाँडा पुग्न पाए। वास्तवमै त्यो कसरत हो भने त्यो बिडम्बनापूर्ण हुनेछ।'
यस्तै सत्तारूढ गठबन्धनले काठमाडौंका सडकमा थुप्रिएको फोहोर उठाउन सरकारको ध्यानाकर्षण गरेकै दिन सत्तारूढ तीन दलका स्थानीय नेताले भने बञ्चरेडाँडाको आन्दोलनमा साथ दिने घोषणा गरेका छन्।
नेपाली कांग्रेस, माओवादी केन्द्र र एकीकृत समाजवादीको धादिङ धुनिबेसी नगरपालिका- १ का अध्यक्षले पीडित जनताको आन्दोलनमा आफूहरूको साथ रहने भन्दै आइतबार संयुक्त विज्ञप्ति जारी गरेका हुन्।
विज्ञप्तिमा कांग्रेसका पूर्णसिंह तामाङ, माओवादी केन्द्रका विष्णु तामाङ र एकीकृत समाजवादीका भिषण धितालले हस्ताक्षर गरेका छन्।
आइतबारै बालुवाटारमा भएको सत्तारूढ गठबन्धनको बैठकले काठमाडौंका सडकमा थुप्रिएको फोहोर तत्काल उठाउन सकारको ध्यानाकर्षण गर्ने निर्णय गरेको थियो।
उता सिसडोल र बञ्चरेडाँडाका स्थानीयले साउन ३१ सम्म आफ्ना माग सम्बोधन गर्न प्रक्रिया अघि नबढे भदौ १ देखि फोहोर पूरै निषेध गर्ने चेतावनी दिएका छन्।
यसबीच धुनिबेसी नगरपालिका- १ का तीन जना नेताले स्थानीयको आन्दोलनमा समर्थन जनाएपछि फोहोरमैला व्यवस्थापनको मुद्दा थप पेचिलो बनेको छ।
विभिन्न चरणमा काठमाडौं महानगर लगायत विभिन्न निकायसँग १७४ वटा सहमति हुँदा पनि कार्यान्वयन नगरेको उनीहरूको विज्ञप्तिमा छ। महानगर लगायतका निकायले सहमति कार्यान्वयन नगरी राज्यशक्ति दुरूपयोग गर्दै पीडित जनतालाई दुःख दिएको उनीहरूको आरोप छ।
फोहोरमैलाले मानव स्वास्थ्यमा प्रतिकूल असर पार्दा पनि महानगर लगायत सरकारी निकायले व्यवस्थापनलाई हलुका रूपमा लिएको र स्थानीय बासिन्दाको उचित माग पनि पूरा नगरेको उनीहरूले बताएका छन्।
त्यस्तै उनीहरूले काठमाडौंको फोहोरमैला समस्या सधैंका लागि समाधान गर्न नेकपा एमालेसहित सर्वदलीय बैठक र समझदारीको आह्वान गरेका छन्।
यो पनिः
