चाडपर्वको बेला भारतसँग सीमा जोडिएका नेपाली बजार सुनसान हुँदा सीमापारिका भारतीय बजार गुल्जार हुने गरेका छन्।
भारतबाट सामान आयात हुने दोस्रो ठूलो नाका रूपन्देहीको बेलहिया हो। सोही नाका हुँदै दैनिक सयौं नेपाली उपभोक्ता किनमेलका लागि भारतीय बजार सुनौली पुग्ने गर्छन्।
बस्तुको गुणस्तरभन्दा पनि चाडपर्वका बेला सस्तोमा सामान पाइने लोभले उपभोक्ताहरू भारत पुग्ने गर्छन्।
यसैबीच सुनौली बजार जाने नेपालीलाई रोक्न सिद्धार्थ उद्योग वाणिज्य संघले दसैं लक्षित सस्तो बजार सञ्चालन गर्ने भएको छ।
नेपाली उपभोक्तालाई स्वदेशमै सामान खरिद गर्ने बानी विकास गर्न र सस्तो दरमा गुणस्तरीय सामान उपलब्ध गराउने उद्देश्यसहित संघले सस्तो बजार सञ्चालन गर्न लागेको हो।
दसैंको घटस्थापनाको भोलिपल्ट असोज ११ गतेदेखि संघको कार्यालय परिसरमै सञ्चालन गरिने सस्तो बजार चार दिनसम्म जारी रहने संघका अध्यक्ष भीष्म प्रसाद न्यौपानेले जानकारी दिए।
न्यौपानेका अनुसार विगतका दुई वर्ष कोरोना महामारीले प्रभावित बनेको आर्थिक क्षेत्रलाई केही चलायमान बनाउन बजार सञ्चालनमा ल्याइएको हो। त्यस्तै नेपाली उपभोक्तालाई भारत र नेपाली बजारमा पाइने वस्तुको गुणस्तर र मूल्यबारे सचेत बनाउन समेत सस्तो बजार प्रभावकारी हुने बताउँछन्।
सस्तो बजारमा साल्ट ट्रेडिङ, खाद्यान्न, जुत्ता चप्पल, दैनिक उपभोग्य वस्तु, दुई पांग्रे अटोमोबाइल्ससहितका १५ देखि १७ वटा स्टल रहने छ।
‘चार दिनको हाम्रो यस प्रयासबाट केही हदसम्म भैरहवा बजारमा आर्थिक चलायमान हुने र उपभोक्ताहरु आफैंले सीमापारि र वारि पाइने वस्तुको गुणस्तर र मूल्यबारे जानकारी लिन सक्ने छन्’, न्यौपानेले भने।
सीमा क्षेत्रका भारतीय बजारहरू नेपाली उपभोक्ता लक्षित गरी सञ्चालन गरिएको हुन्।
त्यहाँ बिक्री वितरण हुने वस्तुहरू केही सस्तो जस्तो देखिए पनि गुणस्तरमा कमसल हुने भए पनि त्यसलाई पहिचान गर्न नसक्दा नेपालीहरू ठगिने गरेका छन्। चाडपर्व लक्षित यस्ता बजारले एकै स्थानमा सबै वस्तु किनमेल गर्न पाइनुका साथै गुणस्तरप्रति पनि उपभोक्ताहरुलाई सचेत बनाउने संघको दाबी छ।
संघका वरिष्ठ उपाध्यक्ष ठाकुरकुमार श्रेष्ठले सीमा क्षेत्रको बजार भएकाले किनमेलको लागि भारततर्फ जाँदा भैरहवाको बजार सुनसान हुने गरेकोले किनमेलको लागि भारत जाने प्रवृत्तिको अन्त्य गर्नुपर्ने बताए।
सस्तो बजारमा खरिद गर्ने उपभोक्ताहरुका लागि ५ देखि २० प्रतिशतसम्म छुट सुविधा दिने संघले जनाएको छ। भैरहवासँग जोडिएको भारतीय बजार सुनौलीमा सामान खरिद गर्न जाने नेपाली उपभोक्ताहरुको दैनिक भिड लाग्ने गर्छ। उक्त भिड चाडपर्वको समयमा १० गुणासम्म बढ्ने गर्छ।
दैनिक उपभोग्य वस्तु किनमेलकै लागि उपभोक्ताहरु भारतीय बजारमा जाँदा एकतर्फ सरकारलाई राजश्व बुझाएर व्यवसाय गर्दै आएका नेपाली व्यवसायीहरू मर्कामा पर्ने गरेका छन् भने अर्कातर्फ भन्सार नतिरी दैनिक लाखौंको सामान नेपाल भित्रिँदा मूलुकले राजस्व समेत गुमाउँदै आएको छ।
सीमा क्षेत्रका नेपाली व्यवसायीले दैनिक उपभोग्य सामान किनमेलको लागि भारतीय बजार जाने नेपाली उपभोक्ता रोक्न भन्सार तथा प्रशासनसँग वर्षौंदेखि माग गर्दै आएका छन्।
संघका महासचिव विजय पाण्डेले नेपाली उपभोक्ताले स्वदेशमै किनमेल गर्ने बानीको विकास गर्न सके आफू गुणस्तरमा ठगिनबाट जोगिनुको साथै नेपाली व्यवसाय समेत फस्टाई सरकारको राजश्वमा पनि वृद्धि हुने बताए।
