डा. विशद दाहालको निलम्बन फिर्ता गर्न केएमसीलाई शिक्षामन्त्रीको निर्देशन

सेतोपाटी संवाददाता

काठमाडौं, पुस २४

शिक्षा, विज्ञान तथा प्रविधि मन्त्री अशोक कुमार राईले आवासीय चिकित्सक विशद दाहालमाथि लगाइएको निलम्बन तत्काल फिर्ता गर्न केएमसी अस्पताललाई निर्देशन दिएका छन्।

मंगलबार मन्त्री राईले काठमाडौं विश्वविद्यालयलाई पत्रमार्फत् डा.दाहाल माथिको निलम्बन फिर्ता गरी पठनपाठन सुरू गर्ने गरी वातावरण बनाउन निर्देशन दिएका हुन्।

'काठमाडौं विश्वविद्यालयबाट हेल्थ क्याम्प र फिल्ड भिजिटसम्बन्धी कार्यविधि तर्जुमा भएपछि मात्र स्वास्थ्य शिविरमा विद्यार्थीहरूलाई खटाउने कार्य गर्नू, गराउनू हुन र निलम्बित विद्यार्थी डा. विशद दाहालको निलम्बन तत्काल फिर्ता गरी कलेजमा स्वस्थ शैक्षिक वातावरण तयार गर्न गराउन काठमाडौं विश्वविद्यालय ऐन, २०४८ को दफा १३ (क) को उपदफा ३ बमोजिम निर्देशन दिएको छु,' पत्रमा भनिएको छ।

हिजो सोमबार नै सम्बन्धित निकायबीच भएको छलफलमा मन्त्रालयले अस्पताललाई डा. दाहाल माथिको निलम्बन फिर्ता गर्न आग्रह गर्दै आज दिउँसो सम्मको समय दिएको थियो। तर अस्पतालबाट कुनै जवाफ नआएपछि मन्त्रालयले डा. दाहाल माथिको निलम्बन फिर्ता गर्न लिखित निर्देशन नै दिएको छ।

काठमाडौं विश्वविद्यालयले यसअघि नै अस्पताललाई डा. दाहाल माथिको निलम्बन स्थगन गर्ने निर्देशन दिएपनि अस्पतालले त्यसलाई वेवास्ता गरेको थियो।

अहिले डा. दाहालसहितको आवासीय चिकित्सकको टोली र अस्पतालबीच छलफल जारी छ।

सम्बन्धित समाचार:

केएमसीका सञ्चालक सुनिल शर्मा भन्छन्- विशद दाहाललाई काठमाडौं विश्वविद्यालयमै फिर्ता पठाइदिन्छौं

शिक्षा मन्त्रालयले केएमसीलाई भन्यो- डा. विशद दाहालको निलम्बन फिर्ता गर्नू

डाक्टर दाहालमाथि केएमसीको प्रतिशोध

गेटमा 'बाउन्सर' राखेर केएमसीले आज पनि दिएन डा. दाहाललाई अस्पताल छिर्न

विश्वविद्यालयको निर्णय अवज्ञा गर्दै डा. दाहाललाई अस्पताल छिर्न दिएन केएमसीले

प्रकाशित मिति: मंगलबार, पुस २४, २०८० १५:०६

सिफारिस