सशस्त्र प्रहरी बल नेपालले सबै कार्यालयहरूमा मनसुनको समयमा बाढी, पहिरो, डुबान एवं विपदमा परेकाहरूको तत्कालै उद्धारको लागि मनसुन प्रतिकार्य टोली तयारी हालतमा राखेको छ।
आवश्यक स्रोत साधनसहित तैनाथ जनशक्तिले बाढी पहिरो र डुवानको सम्भावित इलाकामा ह्याजार्ड म्यापिङ गरी ती स्थानहरूमा केन्द्रित भई लामो र छोटो गस्ती थालेको छ। त्यस्तै देशभरका कार्यालयहरूमा डिजास्टर फोकल पर्सनहरू तोकेर आवश्यक समन्वय गर्ने व्यवस्था समेत मिलाइएको सशस्त्र प्रहरी बलका प्रवक्ता डिआइजी कुमार न्यौपानेले जानकारी दिए।
देशभर स्थापना भएका राष्ट्रिय आपतकालिन कार्य संचालन केन्द्र, प्रदेश आपतकालिन कार्य संचालन केन्द्रहरू, जिल्ला आपतकालिन संचालन केन्द्रहरूमा तालिम प्राप्त सशस्त्र प्रहरी कर्मचारीहरू खटिएर आवश्यक समन्वय थालिसकेको छ।
विपदमा परेकाहरूको तत्कालै उद्धारको लागि ३९ जिल्लाको ५९ वटा सशस्त्र प्रहरी बल नेपालका कार्यालयहरूमा १ सय २० वटा मोटर वोट तथा र्याफ्ट बोटहरू तयारी अवस्थामा राखिएका छन्।
९१ जना गोताखोरलाई आवश्यक उपकरणसहित सात वटै प्रदेशमा रहेका बाहिनी मुख्यालयहरू तथा सशस्त्र प्रहरी बल, नेपाल विपद व्यवस्थापन तालिम शिक्षालय कुरिनटार, उपत्यकास्थित नं. २० विपद उद्धार गण सिनामंगल, नं. २४ कालिका गण कास्की, सिन्धुलीको खुर्कोट बेसमा तैनाथ गरिएको छ।
यसैगरी विपद् व्यवस्थापन तालिम प्राप्त जनशक्तिसहित धनकुटाको मुलघाट, बाराको निजगढ, धादिङको आदमघाट, सिन्धुलीको खुर्कोट, मकवानपुरको कुलेखानी, म्याग्दीको नारच्याङ, दाङको भालुवाङ, सुर्खेतको चिप्ले र डडेलधुराको अमरगढीमा गरी नौ वटा विपद् व्यवस्थापन बेस स्थापना गरिएको छ।
विपद् व्यवस्थापन तालिम प्राप्त जनशक्तिलाई सातै वटा प्रदेशस्थित बाहिनी मुख्यालयहरू, उपत्यकास्थित नं. ९ पशुपतिनाथ बाहिनी मुख्यालय, १० वटा शिक्षालय, सबै गणहरूमा एक/एक प्लाटुन र गुल्म वा सो भन्दा साना युनिटहरुमा १ सेक्सनको दरले आवश्यक स्रोतसाधनसहित तैनाथ गरिएको छ।
राष्ट्रिय विपद् जोखिम न्यूनिकरण तथा व्यवस्थापन प्रधिकरणद्वारा सशस्त्र प्रहरी बल नेपाललाई हस्तान्तरण गरिएका ८ वटा मास क्याजुल्टी भेहिकल र ८ वटा ए क्लासका एम्बुलेन्सलाई परिचालन गर्न सक्ने गरी सुनसरी, महोत्तरी, कुरिनटार, पोखरा, रुपन्देही, सुर्खेत, कैलाली र काठमाडौंमा तयारी अवस्थामा राखिएको छ।
विपद्को समयमा शुद्ध पिउने पानीको अभावलाई पूर्ती गर्न अमेरिकी दुतावासद्धारा निर्मित डिप ट्युवेल काठमाडौंको ७ स्थानसहित कास्की, नवलपरासी, बाँके, कैलालीमा तयारी अवस्थामा छ।
त्यस्तै, अमेरिकी दूतावासबाट प्राप्त डिजास्टर रिलिफ सिस्टमका २८ वटा कन्टेनर १३ जिल्लाका १५ वटा सशस्त्र प्रहरी बल नेपालका कार्यालयहरुमा वितरण गरी तयारी हालतमा राखिएको छ भने ५ वटा कन्टेनर जाजरकोट भुकम्पमा प्रयोग गरी सकिएको छ।
देशभर रहेका सशस्त्र प्रहरी बल नेपालका कार्यालयहरुमा २४सैं घण्टा स्ट्यान्डबाइ रहेका छन्।
बाहिनी मुख्यालहरू, शिक्षालय तथा गणहरुमा सिनियर अफिसरको कमाण्डमा १ प्लाटुन, जिल्लास्थित गुल्ममा जुनियर अफिसरको कमाण्डमा २० जना, अन्य गुल्महरूमा जुनियर अफिसरको कमाण्डमा १५ जना, बीओपी तथा सुरक्षा बेसहरूमा जुनियर अफिसरको कमाण्डमा १० जनाको टोली आवश्यक सामग्रीसहित २४सैं घण्टा खटिइने गरी स्ट्यान्ढबाइ रहेका छन्।
यसैगरी झापा, सप्तरी, बारा, चितवन, रुपन्देही, बाँके, कैलाली, भक्तपुर, मकवानपुर र तनहुँमा रहेका १० वटा सशस्त्र प्रहरी बल नेपालका इमिडियट रेस्पोन्स टिम पोष्ट तथा सबै प्रदेशमा रहेका १३ वटा हेभि इक्यूपमेन्ट हरुलाई समेत तयारी अवस्थामा राखिएको छ।
त्यस्तै राष्ट्रिय आपतकालिन संचालन केन्द्रको स्वामित्वमा रहेको सामाग्रीहरू जस्तै लत्ताकपडा, त्रिपाल, टेन्टहरू सशस्त्र प्रहरी बल नेपाल नं. २ छिन्नमस्ता बाहिनी मुख्यालय महोत्तरी, नं. २० विपद् उद्धार गण र नं. २२ गुहेश्वरी गण भक्तपुर तयारी अवस्थामा राखिएको छ।
विपद् प्रतिकार्यको पूर्वतयारीको लागि सशस्त्र प्रहरी बल नेपालले विभिन्न संघसंस्था तथा महानुभावहरुसँग छलफल गरी विपद् व्यवस्थापनका चुनौती तथा प्रतिकार्यका लागि समुदाय लक्षित तालिम संचालन सम्बन्धी सशस्त्र प्रहरी बल नेपालको गतिविधि एवं आगामी लक्ष्य लगायत विविध विषयहरुमा छलफल गरिएको छ। छलफलमा विपद् व्यवस्थापन बेसहरुको संख्या वृद्धि तथा पर्वतीय उद्धार सम्बन्धी आगामी दिनमा गर्न सकिने योजनाहरूको समेत छलफल भएको छ।
विपद्जन्य घटनाको पूर्वतयारीमा सशस्त्र प्रहरी बल, नेपालले विपद्सँग सम्बन्धित सम्पूर्ण सरोकारवाला निकायहरुको समन्वय र सहकार्यमा कृत्रिम अभ्यासहरु गर्दै आईरहेको तथा अन्य निकायहरुले आयोजना गरेका कृत्रिम घटना अभ्यासहरुमा समेत सशस्त्र प्रहरी बल नेपालले सहभागिता जनाउनुको साथै पीडित नागरिकहरुको उद्धार एवं प्राथमिक उपचार र सुरक्षित स्थानान्तरण सम्मका पूर्व तयारी गर्दै आइरहेको छ।
सशस्त्र प्रहरी बल नेपालका इकाईहरुबाट विपद् प्रतिकार्यका लागि मनसुन अवधिभर ५० वटा टोली विभिन्न स्थानहरुमा परिचालन गरिसकिएको छ भने प्रदेशस्थित ७ वटै बाहिनी मुख्यालयहरुमा विपद् व्यवस्थापन टोली तयारी अवस्थामा छ।
उपत्यकामा आइपर्न सक्ने सम्भावित जोखिमलाई मध्यनजर गर्दै सिनामंगलस्थित सशस्त्र प्रहरी बल नेपाल नं. २० विपद् उद्धार गणलाई पनि तत्काल परिचालित हुन सक्ने गरी तयारी अवस्थामा राखिएको छ।
यसैगरी देशभर रहेका सशस्त्र प्रहरी बल नेपालका इकाईहरुमा पनि विपद् प्रतिकार्यमा परिचालन गराउनका लागि निश्चित जनशक्तिलाई आवश्यक उपकरणहरूसहित तयारी अवस्थामा राखिएको छ जस अनुरूप एक पटकमा २४सैं घण्टा रहने गरी ५ सय ४६ इकाइहरूमा ७ हजार ४ सय ५५ जनाको जनशक्ति तयारी हालतमा छन्।
