जिल्ला कारागार नवलपरासी पश्चिमका प्रमुख घुस लिएको आरोपमा पक्राउ परेका छन्।
कारागार प्रमुख विनोदकुमार दत्तलाई अख्तियार दुरुपयोग अनुसन्धान आयोगको टोलीले डेढ लाख रुपैयाँ सहित निवासबाट पक्राउ गरेको हो।
विराटनगर महानगरपालिका वडा नं. १० घर भएका दत्तको साथबाट घुसवापत बुझेको १ लाख र स्रोत नखुलेको ५० हजार रुपैयाँ बरामद भएको अख्तियारले जनाएको छ।
दत्तलाई निवासको दराजमा राखेको अवस्थामा रकमसहित आइतबार पक्राउ गरिएको अख्तियार दुरुपयोग अनुसन्धान आयोगको कार्यालयले जनाएको छ।
कारागारमा सजाय भुक्तान गरिरहेका एक कैदीबन्दीलाई कारागारको चौकिदार बनाइदिने भन्दै उनले रकम लिएको स्रोतको दावी छ।
कारागार, प्रहरी र जिल्ला प्रशासन कार्यालका प्रतिनिधि सम्मिलित समितिले कारागारमा चौकीदार छनौट गर्ने प्रचलन छ।
चौकिदार छनोटको लागि सोमबार उक्त समितिको बैठक बस्ने मिति तय भएको थियो।
पश्चिम नवलपरासीका प्रमुख जिल्ला अधिकारी स्किम श्रेष्ठले कारागार प्रमुख दत्तलाई अख्तियारको टोलीले पक्राउ गरेको जानकारी पाएको तर रकम र अन्य विषयबारे भने जानकारी नभएको बताइन्। पक्राउ परेका दत्तमाथि थप अनुसन्धान भइरहेको अख्तियारले जनाएको छ।
