युरोपका विभिन्न देशमा उडिरहेका सात यात्रुवाहक विमानमा बम राखिएको सूचनापश्चात सुरक्षा जाँच गरिएको छ।
मंगलबार विभिन्न देशमा उडिरहेका विभिन्न एयरलाइन्सका सात वटा जहाजमा बम राखिएको भन्ने सूचना प्रवाह भएका थिए।
तीमध्ये दुईवटा विमान बेलायतबाट उडेका थिए। विमानमा विस्फोटक पदार्थ नभेटिए पनि घटनाहरू एकआपसमा सम्बन्धित छन् कि छैनन् भन्नेबारे विभिन्न देशका अधिकारीहरूले अनुसन्धान गरिरहेका छन्।
बिबिसीका अनुसार आयरल्यान्डको डब्लिन र पोर्चुगलको लिस्बनबाट रोम पुगेका रायन एयरका दुई विमानमा अज्ञात व्यक्तिले बम राखेको भन्ने सूचना आएको थियो।
रोमको फ्युमिचिनो विमानस्थलमा अवतरण गरेपछि ती विमानको यात्रु, सामान र विमानभित्रै सुरक्षा जाँच गरिएको थियो। चेकजाँच गर्दा विस्फोटक पदार्थ नभेटिएको भनेर बिबिसीले लेखेको छ।
डब्लिनबाट आएको विमानलाई अवतरण गर्नुअघि इटालीको वायुसेनाले आकाशमै सुरक्षा प्रदान गर्दै विमानस्थलसम्म पुर्याएको थियो। पोल्यान्ड, स्पेन र बुल्गेरियामा पनि विमानहरूमा बमको धम्की आएपछि जाँच गरिएको थियो।
स्पेनको दक्षिणी सहर मुर्सियामा अवतरण गरेको म्यानचेस्टरबाट आएको रायनएयरको विमानमा पनि सूचना अनुसार विस्फोटक पदार्थ नभेटिएको बिबिसीले जनाएको छ।
विमानमा रहेकी एक यात्रु साराले बिबिसी रेडियोसँग उडानका क्रममा आफूहरूलाई कुनै जानकारी नदिइएको बताइन्।
उनका अनुसार विमान अचानक रोकिएपछि यात्रुलाई करिब ३० मिनेटसम्म धावनमार्गमै राखिएको थियो।
त्यसपछि दमकल, प्रहरी र बम निष्क्रिय पार्ने टोली विमाननजिक पुगेका थिए।
यात्रुलाई आफ्ना सामान विमानमै छाडेर बाहिर निस्कन भनिएको थियो। अवतरणपछि मात्रै आफूहरूले विमानमा बमको धम्की आएको थाहा पाएको उनले बताइन्।
पोल्यान्डको राजधानी वार्सा जाँदै गरेका दुई विमानमा पनि बम राखिएको सूचना पुगेको थियो।
तीमध्ये लन्डनको हिथ्रो विमानस्थलबाट उडेको एउटा विमानलाई वार्साको चोपिन विमानस्थलमा अवतरण गराउने तयारी थियो। तर बमको धम्कीपछि त्यसलाई अर्को सानो मोडलिन विमानस्थलमा डाइभर्ट गरिएको थियो।
त्यसक्रममा मोडलिन विमानस्थल केही समयका लागि बन्दसमेत भएको थियो।
बुल्गेरियाको राजधानी सोफिया जाँदै गरेका दुई विमानमा पनि बम राखिएको सूचना आएको त्यहाँका यातायातमन्त्री जर्जी पिभले बताएका छन्।
उनका अनुसार एउटा विमान उत्तरी इटालीको बर्गामो र अर्को डब्लिनबाट आएको थियो। दुवै विमानलाई गन्तव्यमा अवतरण गर्न दिइएको थियो। जाँच गर्दा कुनै विस्फोटक पदार्थ नभेटिएको उनले बिबिसीसँग बताएका छन्।
बेलायत सरकारले यी घटनालाई ‘दुर्भावनापूर्ण झुटा धम्की’ भनेको छ।
बेलायतको विमान सुरक्षा प्रणाली विश्वकै बलियोमध्ये एक रहेको र यस्ता सम्भावित तथा झुटा धम्की सामना गर्न परीक्षण गरिएको रहेको सरकारले जनाएको छ।
यद्यपि, विभिन्न देशमा एकै दिन र फरक–फरक विमानमा यस्ता धम्की आउनुलाई असामान्य मानिएको छ।
विमान सुरक्षा विज्ञ पल मेसनले यात्रुवाहक विमानमा बमको धम्की बारम्बार नआउने भएकाले पछिल्ला घटना असामान्य रहेको बताए।
फरक एयरलाइन्सका विमानमा विश्वसनीय देखिने गरी धम्की आउनुले यो संयोग मात्र नभई योजनाबद्ध गतिविधि हुन सक्ने उनको आकलन छ।
उनका अनुसार धम्कीको विश्वसनीयता जाँच्न विमानभित्रका चालक दल र जमिनमा रहेका अधिकारीहरूले विभिन्न प्रक्रिया अपनाउँछन्। धम्की गम्भीर देखिए विमानलाई अर्को विमानस्थलमा अवतरण गराउन सकिन्छ। विमान अवतरण गरेपछि सामान्यतया त्यसलाई छुट्टै स्थानमा राखेर यात्रुलाई बाहिर निकालिन्छ र प्रहरी तथा बम निष्क्रिय पार्ने टोलीले जाँच गर्छन्।
यसैबीच, ग्रीसको एजियन सागरस्थित सिरोस टापुको बन्दरगाहमा रोकिएको इसराइल जाँदै गरेको क्रुज पानी जहाजमा पनि बमको सूचना आएपछि १ हजार ५३७ यात्रु तथा चालक दलका सदस्यलाई बाहिर निकालिएको थियो।
पानामाको झन्डा रहेको ‘क्राउन आइरिस’ जहाजमा गरिएको प्रारम्भिक जाँचमा विस्फोटक पदार्थ भने नभेटिएको बिबिसीले जनाएको छ। त्यसपछि जहाजले यात्रा पुनः सुरु गर्ने तयारी गरेको थियो।
यी घटनाभन्दा एक दिनअघि लन्डनको लुटन विमानस्थलबाट उडेको विज एयरको विमानले पनि बमको धम्कीपछि हंगेरीको राजधानी बुडापेस्टमा आपत्कालीन अवतरण गरेको थियो।
त्यसलाई हंगेरीको लडाकू विमानले आकाशमै एस्कर्टिङ गरी विमानस्थलमा अवतरण गराएको थियो। जाँच गर्दा त्यहाँ पनि विस्फोटक पदार्थ भेटिएको थिएन।
अहिलेसम्म यी सबै घटनामा कसको संलग्नता रहेको भन्ने पुष्टि भएको छैन।
तर युरोपका विभिन्न देशका अधिकारीहरूले यी धम्कीहरू हवाई उडान अवरुद्ध पार्ने उद्देश्यले समन्वय गरेर गरिएको गतिविधि हो कि भन्ने कोणबाट अनुसन्धान भइरहेको बिबिसीले जनाएको छ।
