कञ्चनपुरमा तीन किशोरी पानी जमेको ठाउँ (खल्ला क्षेत्र)मा डुबेर बेपत्ता भएका छन्।
पुनरवास नगरपालिका-५ राताेखालेकाे डुवान भएको खल्ला क्षेत्रमा पाैडी खेल्न गएका तीन किशोरीहरू बेपत्ता भएको प्रहरीले जनाएको छ।
जिल्ला प्रहरी कार्यालय कञ्चनपुरका प्रहरी निरीक्षक पुष्कर पन्तका अनुसार साेही ठाउँका १५ वर्षीया लक्ष्मी बाेगटी, १५ वर्षीया सीर्जना बाेगटी र १६ वर्षीया आरती बाेगटी बेपत्ता भएका छन्।
बेपत्ता भएका तीन जना किशोरीहरूकाे खाेजीकार्य भइरहेको प्रहरीले जनाएको छ।
यस्तै भारी वर्षाका कारण १ हजार १ सय १२ घरधुरीका ४ हजार १ सय ६५ जनालाई सुरक्षित ठाउँमा सारिएको छ।
डुबानमा परेका ३९ जनाकाे उद्धार भएको प्रहरी निरीक्षक पन्तले जानकारी दिए।
महाकाली पारीकाे स्थानीय तह दाेधाराचाँदनी नगरपालिकामा डुवानका कारण बढी स्थानीयहरू प्रभावित भएका छन्। भीमदत्त नगरपालिका, पुनरवास नगरपालिका, लालाझाडी गाउँपालिका, बेल्लडाँडी गाउँपालिका लगायतका ठाउँमा डुबान भएको छ।