काठमाडौं जिल्ला अदालतमा प्रहरीमाथि हातपात गरेको भन्दै कर्मचारीहरूले वकिललाई कारबाही गर्न माग गरेका छन्।
अदालतको गेट नम्बर ३ मा गत असार २३ गते सुरक्षामा खटिएका प्रहरी जवान जीवन छिनालमाथि हातपात गरेको भन्दै कानुन व्यवसायी नानी थापा भन्ने लक्ष्मी थापामाथि कारबाही गर्न माग गर्दै अदालतका कर्मचारीहरूले संयुक्त माग गरेका हुन्।
यसबारे दुई पक्षबीच छलफल भइरहेको छ। प्रहरी जवान छिनालले प्रहरी वृत्त सिंहदरबारमा अभद्र व्यवहार गर्न नहुने कसुरमा जाहेरीसमेत दिएका थिए।
यता कानुन व्यवसायी थापाले पनि आफूमाथि प्रहरी जवानले दुर्व्यवहार गरेको दाबी गरेकी छन्।
उनले प्रहरी जवानमाथि छानबिन गरी निलम्बन गर्न माग समेत गरेकी छन्। उनको अनुहारमा चोट लागेको थियो।
कानुन व्यवसायी थापा एक जना ‘क्लाइन्ट’लाई लिएर ३ नम्बर गेटमा पुगेकी थिइन्। त्यहाँबाट सर्वसाधरणलाई जान निषेध रहेको भन्दै प्रहरीले रोकेका थिए।
त्यही विषयमा दुई पक्षबीच विवाद भएको थियो। त्यसैबीच दुई जनाबीच हातपात भएको सिसिटिभी फुटेजमा देखिएको स्रोतले बतायो। प्रहरी जवान छिनालले आफूमाथि कानुन व्यवसायी थापाले पहिले थप्पड हिर्काएको र प्रतिकार गर्दा उनको गालामा नङले लाग्दा चोट लागेको दाबी गर्छन्।
