सर्लाहीमा पूर्वभूमि सुधार राज्यमन्त्री रामचन्द्र रायको हत्या भएको घटनामा प्रहरीले घरका सहयोगीसँग सोधपुछ गरेको छ।
चन्द्रपुर गाउँपालिका वडा नम्बर १ रतनपुरस्थित घरको कोठाभित्र ८० वर्षीय रायको गए राति हत्या भएको हो।
उनको घरमा सहयोगीको रूपमा काम गर्दै आएका रामउदेक रायसँग सोधपुछ भइरहेको जिल्ला प्रहरी कार्यालय सर्लाहीका एसपी रवीन्द्र सिंहले बताए।
‘घरमा तीन जना आएका थिए भनेर भनेका छन्। सहयोगीले देखेका घटनाबारे हामीले अनुसन्धानका लागि सोधपुछ गरिरहेका छौं,’ एसपी सिंहले भने, ‘उनी घरमा खाना पकाउने र सरसफाइ गर्ने सहयोगी हुन्।’
प्रहरीलाई सोमबार राति १ बजेतिर घटनाबारे खबर पुगेको थियो। खबरपछि प्रहरी घटनास्थलमा पुगेको थियो। कोठाभित्र मृत अवस्थामा राय फेला परेका थिए।
डिएसपी दीपक श्रेष्ठका अनुसार रायको टाउकोमा धारिलो हतियार प्रहार भएको देखिएको छ। उनको टाउकोको बायाँ भागमा चोट छ।
मधेस प्रहरी प्रमुख डिआइजी यज्ञविनोद पोखरेल पनि घटनास्थलमा पुगेका छन्। प्रदेश प्रहरी कार्यालय र जिल्ला प्रहरी कार्यालयबाट अनुसन्धानको टोली खटिएको छ।
तालिम प्राप्त कुकुर परिचालन गरी अनुसन्धान अघि बढाएको छ।
चन्द्रपुर गाउँपालिकाका अध्यक्ष राजकुमार महतोका अनुसार पूर्वराज्यमन्त्री राय आइतबार रतनपुर आएका थिए। उनी परिवारसहित मलंगवा बस्छन्। रतनपुरमा भएको त्यो घर पुरानो हो। त्यहाँ उनको खेतीपाती पनि छ।
खेतीपाती हेर्न उनी रतनपुर आइराख्थे। त्यहाँ खाना बनाउनका लागि भनेर एक जना भान्से पनि राखेका छन्।
अध्यक्ष महतोका अनुसार आइतबार राति खाना खाइसकेपछि तीन जना व्यक्तिहरू रायलाई भेट्न आएको ती सहयोगीले बताएका छन्।
‘ती मान्छेहरूसँग कुराकानी भइरहँदा उहाँले सहयोगीलाई छतमा गएर सुत भन्नुभएको रहेछ। त्यसपछि उनी छतमा गएको र राति उनको हत्या भएको थाहा भएपछि प्रहरीलाई खबर गरेको भनेका छन्,’ अध्यक्ष रायले भने।
रायको शव पोष्टमर्टमका लागि प्रादेशिक अस्पताल मलंगवा पुर्याइएको छ। राय ३० वर्षअघि राप्रपाबाट राज्यमन्त्री भएका थिए।
